নিউজ ডেস্ক, 13 ছেপ্টেম্বৰ : বুধবাৰে কৰ্ণাটকৰ মুখ্যমন্ত্ৰী সিদ্ধাৰামাইয়াৰ অধ্যক্ষতাত কাবেৰী নদীৰ পানী ভাগ-বতৰা বিষয়ক লৈ অনুষ্ঠিত জৰুৰী কেবিনেট বৈঠকৰ পিছত মুখ্যমন্ত্ৰীগৰাকীয়ে কয় যে কৰ্ণাটক তামিলনাডুৰ সৈতে কাবেৰী পানী ভাগ-বতৰা কৰিব পৰা অৱস্থাত নাই ৷ সিদ্ধাৰামাইয়াই কয় যে তেওঁলোকে উচ্চতম ন্যায়ালয়ৰ কাষ চাপিব আৰু কাবেৰী জল নিয়ন্ত্ৰণ সমিতিৰ সন্মুখতো আবেদন দাখিল কৰিব ৷
কাবেৰী জল নিয়ন্ত্ৰণ সমিতিয়ে ৰাজ্য চৰকাৰক আগন্তুক ১৫ দিনত চুবুৰীয়া ৰাজ্য তামিলনাডুলৈ ৫ হাজাৰ কিউচেক পানী এৰি দিবলৈ নিৰ্দেশ দিয়াৰ পিছতে এই বৈঠক অনুষ্ঠিত হয় ৷ জলসিঞ্চনৰ পৰ্টফলিঅ’ চোৱাচিতা কৰা উপ-মুখ্যমন্ত্ৰী ডি কে শিৱকুমাৰকে ধৰি সকলো দলৰ নেতা আৰু সংসদৰ সদস্য এই বৈঠকত উপস্থিত আছিল ৷ বিধান সৌধৰ কনফাৰেন্স হলত অনুষ্ঠিত হৈছিল এই বৈঠক ৷
বৈঠকৰ অন্তত সিদ্ধাৰামাইয়াই কয় যে কৰ্ণাটক বৰষুণৰ তীব্ৰ অভাৱৰ সন্মুখীন হৈছে আৰু চি ডব্লিউ আৰ চিৰ নিৰ্দেশ অনুসৰি আমি কাবেৰীৰ পানী তামিলনাডুলৈ এৰি দিয়াৰ কোনো অৱস্থাত নাই ৷ তেওঁ আৰু কয় যে, "কম বৰষুণৰ বাবে ইয়াৰ বান্ধ সমূহত পানীৰ নাটনি হৈছে ৷ ৰাজ্যখনত আমি অতি সোনকালে বিশুদ্ধ খোৱাপানীৰ নাটনিৰ সন্মুখীন হ'ম ৷ এই পৰিস্থিতিত আমাৰ বাবে তামিলনাডুৰ সৈতে পানী ভাগ কৰাটো সম্ভৱ নহয়।"
মুখ্যমন্ত্ৰীগৰাকীয়ে আৰু কয় যে, "কাবেৰী পানী নিয়ন্ত্ৰণ সমিতিয়ে আমাক ১৫ দিনৰ বাবে তামিলনাডুলৈ ৫ হাজাৰ কিউচেক পানী এৰি দিবলৈ পৰামৰ্শ দিছিল ৷ আমি এই কাম কৰিব নোৱাৰো ৷ আমি নিশ্চিতভাৱে উচ্চতম ন্যায়ালয়ৰ কাষ চাপিম আৰু নাটনিৰ বাবে আমি সন্মুখীন হোৱা সমস্যাৰ বিষয়ে তেওঁলোকক জনাম ৷"
তেওঁ আৰু কয় যে, "আমি কাবেৰীৰ পানীৰ বিষয়ত আলোচনা কৰিবলৈ প্ৰধানমন্ত্ৰী নৰেন্দ্ৰ মোদীৰ ওচৰলৈ সৰ্বদলীয় প্ৰতিনিধি দল লৈ যোৱাৰ সিদ্ধান্ত লৈছো ৷ আমি তেওঁক কৰ্ণাটকে সন্মুখীন হোৱা সমস্যাৰ বিষয়ে বুজাম ৷ আমি দিল্লীত সকলো সংসদ সদস্যক সাক্ষাৎ কৰি বিষয়টো আলোচনা কৰোঁ ৷"
লগতে পঢ়ক : Nipah virus: নিপা ভাইৰাছৰ সংক্ৰমণ ৰোধিবলৈ তৎপৰ কেৰালা চৰকাৰ, এনআইভি দল উপস্থিত
