নিউজ ডেস্ক, ১ ফেব্ৰুৱাৰী : কেন্দ্ৰীয় বিত্ত মন্ত্ৰী নিৰ্মলা সীতাৰমণে বুধবাৰে লোকসভাত ২০২৩-২৪ বিত্তীয় বাজেট উপস্থাপন কৰে (FM Nirmala Sitharaman Union Budget 2023) । উল্লেখ্য নৰেন্দ্ৰ মোডী নেতৃত্বাধীন বিজেপি চৰকাৰৰ দ্বিতীয়টো কাৰ্যকালৰ এইখন হৈছে অন্তিমখন পূৰ্ণাংগ বাজেট (PM Narendra Modi) । আনহাতে, বিত্ত মন্ত্ৰী হিচাপে নিৰ্মলা সীতাৰমণৰ কাৰ্যকালৰ পঞ্চমখন বাজেট । ২০২৪ বৰ্ষৰ সাধাৰণ নিৰ্বাচন আৰু চলিত বৰ্ষত অনুষ্ঠিত হ'বলগা কেইবাখনো ৰাজ্যৰ নিৰ্বাচনৰ প্ৰতি লক্ষ্য ৰাখি এই বাজেটৰ দিশে চকু আছে সকলোৰে । আনহাতে, কোভিড পৰিস্থিতিৰ পৰিপ্ৰেক্ষিতত ভগ্নপ্ৰায় অৰ্থনৈতিক অৱস্থা, মুদ্ৰাস্ফীতি, ৰাষ্ট্ৰীয় বিকাশৰ হাৰ আদি বিভিন্ন প্ৰতিবন্ধকতাৰ বাবে এইবাৰৰ বাজেট নিৰ্মলা সীতাৰমণৰ বাবে আছিল এক প্ৰত্যাহ্বানমূলক বাজেট ।
অৱশ্যে বিত্ত মন্ত্ৰীয়ে উত্থাপন কৰা ২০২৩-২৪ বিত্তীয় বৰ্ষৰ বাজেটত সৰ্বসাধাৰণৰ বাবে কেইবাটাও সকাহ প্ৰদান কৰা হৈছে । লগতে বিভিন্ন খণ্ডত ঘোষণা কৰা হৈছে নতুন আঁচনি, আবণ্টন কৰা হৈছে ধন । ঠিক তেনেদৰে স্বাস্থ্য খণ্ডত বাজেট (Health in Budget 2023) ঘোষণা কৰি বিত্ত মন্ত্ৰীয়ে কয় যে বাজেটত নতুন নাৰ্ছিং মহাবিদ্যালয়সমূহক (2023 budget promises new nursing colleges) বৰ্ধিত আই চি এম আৰ সুবিধা প্ৰদানৰ প্ৰতিশ্ৰুতি দিয়া হৈছে (ICMR facilities) ।
তেওঁ লগতে কয় যে ২০১৫ চনৰ পৰা চলি থকা বৰ্তমানৰ ১৫৭ খন চিকিৎসা মহাবিদ্যালয়ৰ সৈতে সহ-অৱস্থানত ১৫৭ খন নতুন নাৰ্ছিং মহাবিদ্যালয় স্থাপন কৰা হ'ব । আনহাতে, চৰকাৰে ২০৪৭ চনৰ ভিতৰত চিকল চেল এনিমিয়া (sickle cell anemia) দূৰ কৰাৰ বাবে এক অভিযান কাৰ্যকৰী কৰাৰ পৰিকল্পনা কৰিছে । ইয়াৰ উপৰি চিকিৎসা গৱেষণাত সকলো আইচিএমআৰ পৰীক্ষাগাৰত ৰাজহুৱা আৰু ব্যক্তিগত চিকিৎসা সুবিধাৰ দ্বাৰা গৱেষণাৰ সুবিধা থাকিব । লগতে সকলো উৎকৰ্ষ কেন্দ্ৰতে ফাৰ্মাচিউটিকেলত গৱেষণা আৰু উদ্ভাৱনৰ প্ৰচাৰৰ বাবে নতুন কাৰ্যসূচী থাকিব (promote research and innovation in pharmaceuticals) ।
