নিউজ ডেস্ক, 16 এপ্ৰিলঃ বৃহস্পতিবাৰে কাশ্মীৰ ভ্ৰমণলৈ যাব দেশৰ স্থলসেনা প্ৰধান জেনেৰেল মনোজ মুকুন্দ নাৰাভানে ৷ জম্মু-কাশ্মীৰৰ আন্তঃৰাষ্ট্ৰীয় সীমান্ত নিয়ন্ত্ৰণৰেখাত ক্ৰমান্বয়ে বৃদ্ধি পাই থকা যুদ্ধবিৰতি উলংঘণৰ মাজতে এইদৰে নিয়ন্ত্ৰণৰেখা ভ্ৰমণৰ সিদ্ধান্ত গ্ৰহণ কৰিছে সেনাপ্ৰধানগৰাকীয়ে ৷ প্ৰতিৰক্ষা মন্ত্ৰালয়ৰ শীৰ্ষ সূত্ৰই প্ৰকাশ কৰিছে এই তথ্য ৷
লগতে পঢ়কঃ COVID-19: নাগৰিকক দেশলৈ প্ৰত্যাৱৰ্তনৰ বাবে ভাৰতৰ সহায় ভিক্ষা পাকিস্তানৰ
সীমান্তৰ সীপাৰৰ পৰা পাকিস্তানৰ সমৰ্থিত সন্ত্ৰাসবাদীৰ ভাৰতত অনুপ্ৰৱেশৰ ঘটনা আৰু পাকিস্তানী সেনাৰ দ্বাৰা দিনক-দিনে যুদ্ধবিৰতি উলংঘণ বৃদ্ধি, দুয়োটা দিশৰে বুজ ল’বলৈ সীমান্তত উপস্থিত হ’ব স্থলসেনা প্ৰধানগৰাকী ৷ কৰ’ণা ভাইৰাছৰ দ্বাৰা সৃষ্ট মহামাৰীৰ সময়ত পাকিস্তানৰ এই বৰ্বৰ কাণ্ড ব্যৰ্থ কৰি তুলিবলৈয়ে সেনাপ্ৰধানগৰাকীয়ে এই সিদ্ধান্ত গ্ৰহণ কৰিছে বুলি জানিব পৰা গৈছে ৷
লগতে পঢ়কঃ চুবুৰীয়া ৰাষ্ট্ৰৰ সহায়াৰ্থে সাজু কৰি ৰখা হৈছে ভাৰতীয় সেনা
শ্ৰীনগৰস্থিত প্ৰতিৰক্ষা মুখপাত্ৰ কৰ্ণেল ৰাজেশ কালিয়াই প্ৰকাশ কৰা অনুসৰি, শ্ৰীনগৰত উপস্থিত হৈ সেনাৰ 15 ক’ৰৰ পৰা বিদ্ৰোহী-বিৰোধী আৰু অনুপ্ৰৱেশ বিৰোধী অভিযানৰ বিষয়ে বুজ লোৱাৰ লগতে নিয়ন্ত্ৰণৰেখাও ভ্ৰমণ কৰিব সেনাপ্ৰধানগৰাকীয়ে ৷ ভাৰতৰ ভূমিত পাকিস্তানী সন্ত্ৰাসবাদীৰ প্ৰৱেশ সহজ কৰি তুলিবলৈ পাকিস্তানে কিছুদিনৰ পৰা সীমান্তত যুদ্ধবিৰতি চুক্তি ধাৰাবাহিকভাৱে উলংঘণ কৰি আহিছে বুলি সেনাৰ মুখপাত্ৰগৰাকীয়ে ইটিভি ভাৰতৰ আগত প্ৰকাশ কৰে ৷
লগতে পঢ়কঃ LoC ত পাকিস্তান আৰ্মীৰ গোলাবৰ্ষণ
তথ্য অনুসৰি, চলিত বৰ্ষত বৰ্তমান সময়লৈকে পাকিস্তানে 1,200 বাৰ যুদ্ধবিৰতি উলংঘণ কৰিছে ৷ জানুৱাৰী মাহত 367 বাৰ, ফেব্ৰুৱাৰী মাহত 382 বাৰ আৰু মাৰ্চ মাহত 411 বাৰ যুদ্ধবিৰতি উলংঘণ কৰিছে পাকিস্তানে ৷ বিগত বৰ্ষত নিয়ন্ত্ৰণৰেখাত 3,479 বাৰ যুদ্ধবিৰতি উলংঘণ কৰিছিল পাকিস্তানে ৷
