নেশ্যনেল ডেস্ক, 13 এপ্ৰিল : কংগ্ৰেছৰ অন্তৱৰ্তীকালিন সভানেত্ৰী ছোনিয়া গান্ধীয়ে প্ৰধানমন্ত্ৰী নৰেন্দ্ৰ মোডীলৈ এক পত্ৰ প্ৰেৰণ কৰিছে ৷ ৰাষ্ট্ৰজোৰা লকডাউনৰ ফলত দেশৰ কোনো এজন নাগৰিকে ভোকত থাকিবলগা নোহোৱাতো নিশ্চিত কৰিবলৈ পত্ৰযোগে উল্লেখ কৰে গান্ধীয়ে ৷
পত্ৰখনত ছোনিয়া গান্ধীয়ে কয়, "লকডাউনৰ ফলত দেশৰ লাখ লাখ অসুৰক্ষিত অৱস্থাত জীৱন-যাপন কৰা লোকে খাদ্য সংকটত ভুগিছে ৷ এনেধৰণৰ মহামাৰীৰ বাবে ভাৰতত যথেষ্ট সংখ্যক খাদ্য সামগ্ৰী সংৰক্ষিত আছে ৷"
আনহাতে, 5 কিল'গ্ৰামকৈ ৰেচন প্ৰদান কৰাৰ কেন্দ্ৰীয় চৰকাৰৰ পদক্ষেপক প্ৰশংসা আগবঢ়াই গান্ধীয়ে ৷ ইয়াৰোপৰি, লকডাউনৰ ফলত সাধাৰণ লোকৰ দৈনন্দিন জীৱনত পৰা প্ৰভাৱ নাইকিয়া কৰিবলৈও ব্যৱস্থা গ্ৰহণৰ বাবে কেন্দ্ৰীয় চৰকাৰক পৰামৰ্শ দিয়ে ছোনিয়া গান্ধীয়ে ৷
তেওঁ লগতে কয়, "খাদ্যৰ লগতে অন্যান্য সংকটত ভোগা প্ৰব্ৰজনকাৰী শ্ৰমিকসকলৰ National Food Security Act (NFSA) কাৰ্ড নাথাকিবও পাৰে ৷ ইয়াৰোপৰি, কাৰ্ডৰ যোগ্য বহুলোক এই সেৱাৰ পৰা বঞ্চিত হৈছে ৷"
ইয়াৰোপৰি, খাদ্যৰ ক্ষেত্ৰত দুৰ্ভোগ ভুগিবলগা নোহোৱা বহু পৰিয়ালেও বৰ্তমানৰ সংকটজনক পৰিস্থিতিত পৰি খাদ্যৰ অভাৱ আৰু দাৰিদ্ৰতাত ভুগিছে বুলি ছোনিয়া গান্ধীয়ে পত্ৰত উল্লেখ কৰে ৷
