নেশ্যনেল ডেস্ক, 7 এপ্ৰিল : মঙলবাৰে উচ্চতম ন্যায়ালয়ে কেন্দ্ৰীয় চৰকাৰ আৰু অসম চৰকাৰলৈ প্ৰেৰণ কৰিছে এক জাননী ৷ এন আৰ চিৰ ডিটেনশ্যন কেম্পসমূহত বাস কৰা লোকসমূহৰ ভিৰৰ সমস্যা সম্পৰ্কত দাখিল কৰা এখন ৰাজহুৱা স্বাৰ্থজনিত আবেদনৰ (PIL) প্ৰতিক্ৰিয়া প্ৰকাশ কৰি এই জাননী জাৰি কৰে সৰ্বোচ্চ ন্যায়ালয়ে ৷
উল্লেখ্য যে, তিনিবছৰৰো অধিক সময় ডিটেনশ্যন কেম্পত বাস কৰা লোকসকলক মুক্তি দিবৰ বাবে উচ্চতম ন্যায়ালয়ে ৰাজ্য চৰকাৰক পূৰ্বেই নিৰ্দেশ প্ৰদান কৰিছিল ৷ যিহেতু এই লোকসকলৰ দেশান্তৰকৰণ অসম্ভৱ আৰু অতি অস্বাস্থ্যকৰ পৰিৱেশত তেওঁলোক বাস কৰি থকা বাবে লোকসকলক মুক্তি প্ৰদানৰ নিৰ্দেশ জাৰি কৰা হৈছিল ৷
এই সম্পৰ্কত পুনৰ অহা সোমবাৰে আলোচনা কৰাৰ লগতে ৰাজ্য চৰকাৰৰ পৰা জাননীৰ প্ৰতিক্ৰিয়া বিচাৰে উচ্চতম ন্যায়ালয়ে ৷
উল্লেখ্য যে, অসমৰ বিভিন্ন স্থানৰ জেলসমূহক ডিটেনশ্য়ন কেম্পলৈ পৰিৱৰ্তিত কৰি বহুসংখ্যক লোকক ৰখা হৈছে ৷ অসমত বৰ্তমান থকা এই ছটা ডিটেনশ্যন কেম্প হৈছে - গোৱালপাৰা, ডিব্ৰুগড়, যোৰহাট, শিলচৰ, কোকৰাঝাৰ আৰু তেজপুৰ ৷
জুলাই, 2018 চনত প্ৰকাশিত এন আৰ চিৰ খচৰা অনুসৰি প্ৰায় 4 মিলিয়ন আবেদনকাৰীৰ এন আৰ চিত নাম অন্তৰ্ভূক্ত হোৱা নাছিল ৷ আনহাতে, 2019 চনৰ 31 আগষ্টত প্ৰকাশিত হৈছিল এন আৰ চিৰ চূড়ান্ত তালিকা ৷
