নেশ্যনেল ডেস্ক,১ছেপ্টেম্বৰ: নিৰ্বাচনী আয়ুক্তৰ পদত নিযুক্ত হ'ল প্ৰাক্তন আমোলা তথা সৰ্বভাৰতীয় সেৱা বিষয়া ৰাজীৱ কুমাৰ। মঙলবাৰে নৱনিযুক্ত নিৰ্বাচনী আয়ুক্ত হিচাপে কাৰ্যভাৰ গ্ৰহণ কৰে প্ৰাক্তন আমোলাগৰাকীয়ে । পূৰ্বৰ নিৰ্বাচনী আয়ুক্ত অশোক লাভাছাই এছিয়ান ডেভেলপমেণ্ট বেংকৰ উপাধ্যক্ষ হিচাপে কাৰ্যভাৰ গ্ৰহণ কৰাৰ পিছত নিৰ্বাচনী আয়ুক্তৰ পদত উপবিষ্ট হয় ৰাজীৱ কুমাৰ ।
ঝাৰখণ্ড কেডাৰৰ ১৯৮৪ বৰ্ষৰ সৰ্বভাৰতীয় সেৱা বিষয়া হিচাপে অৱসৰ গ্ৰহণ কৰা নৱনিযুক্ত নিৰ্বাচনী আয়ুক্ত ৰাজীৱ কুমাৰৰ কাৰ্যকাল হ'ব ৫ বছৰ। নিয়ম অনুসৰি এগৰাকী নিৰ্বাচনী আয়ুক্তৰ কাৰ্যকাল ৬ বছৰ আৰু ৬৫ বছৰ বয়সলৈকে তেওঁ কাৰ্যনিৰ্বাহ কৰিব পাৰে । ৰাজীৱ কুমাৰৰ জন্ম হৈছিল ১৯৬০চনত । ৩৬ বছৰৰো অধিক সময়ৰ কাৰ্যকালত কুমাৰে প্ৰথমে বিহাৰ, তাৰ পিছত ঝাৰখণ্ডৰ কেন্দ্ৰ আৰু ৰাজ্য কেডাৰত বিভিন্ন মন্ত্ৰালয়ত সেৱা আগবঢ়াইছে । চলিত বৰ্ষত তেওঁ কেন্দ্ৰীয় বিত্ত সচিব ৰূপে অৱসৰ গ্ৰহণ কৰে আৰু ২৯ এপ্ৰিলত তেওঁক PESB ৰ অধ্যক্ষ হিচাপে নিযুক্তি দিয়া হয় । ২০২৪ চনত লোকসভা নিৰ্বাচনত অধ্যক্ষৰ দায়িত্ব পালন কৰিব কুমাৰে ।
