নেশ্যনেল ডেস্ক, 6 ডিচেম্বৰ : প্ৰিয়ংকা ৰেড্ডী ধৰ্ষণ আৰু হত্যাকাণ্ডৰ মূল চাৰি অভিযুক্তক এনকাউন্টাৰ কৰাৰ পাচতে সংবাদমেলৰ আয়োজন কৰিছে তেলেংগানা আৰক্ষীয়ে ৷ চাইবাৰাবাদ আৰক্ষী আয়ুক্ত ভি. চি. সজ্জনাৰে এনকাউন্টাৰ সন্দৰ্ভত কয় যে, অভিযুক্ত চাৰিজনেই দুটাকৈ অস্ত্ৰ কাঢ়ি লৈ আৰক্ষীৰ ওপৰত গুলীচালনা কৰা আৰম্ভ কৰে ৷ সাৱধান কৰি দিয়াৰ পাচতো চাৰিওজনে আত্মসমৰ্পণ কৰিবলৈ অমান্তি হোৱাত আৰক্ষীয়ে গুলীচালনা কৰিবলৈ বাধ্য হয় ৷ ইয়াৰ ফলত চাৰিওজন অভিযুক্তই প্ৰাণ হেৰুৱায় ৷
লগতে সজ্জনাৰে জানিবলৈ দিয়ে যে, আৰক্ষীয়ে ভুক্তভোগী 'দিশা'ৰ মোবাইল ফোনটোও উদ্ধাৰ কৰিবলৈ সক্ষম হয় ৷ তেওঁ জনাই যে, এই গুলীচালনাৰ ঘটনাত এজন আৰক্ষী উপ-পৰিদৰ্শক আৰু এজন কনিষ্টবলো আঘাতপ্ৰাপ্ত হৈছে ৷ আঘাতপ্ৰাপ্ত দুয়ো আৰক্ষী বিষয়াক ইতিমধ্যে চিকিৎসালয়ত ভৰ্তি কৰোৱাৰ লগতে চিকিৎসা চলি আছে বুলি জানিবলৈ দিয়ে সজ্জনাৰে ৷
এই এনকাউন্টাৰৰ সময়ত 10 জন আৰক্ষী বিষয়া ঘটনাস্থলীত উপস্থিত আছিল বুলি জানিবলৈ দিয়ে সজ্জনাৰে ৷
