নিউজ ডেস্ক, 12 নৱেম্বৰঃ মঙলবাৰে BRICS সন্মিলনত অংশগ্ৰহণৰ উদ্দেশ্যে ব্ৰাজিললৈ উৰা মাৰে প্ৰধানমন্ত্ৰী নৰেন্দ্ৰ মোদী ৷ দুদিনীয়া ভ্ৰমণসূচীৰে ব্ৰাজিললৈ যোৱা প্ৰধানমন্ত্ৰীগৰাকীয়ে 13 নৱেম্বৰ অৰ্থাৎ বুধবাৰে কেইবাখনো দ্বিপাক্ষিক বৈঠকত মিলিত হোৱাৰ লগতে BRICS ব্যৱসায়ী বৈঠকৰ সামৰণি অনুষ্ঠানতো অংশগ্ৰহণ কৰিব ৷ প্ৰধানমন্ত্ৰীগৰাকীৰ লগতে উপস্থিত থাকিব বৈদেশিক সচিব (অৰ্থনৈতিক সম্বন্ধ) টি এছ তিৰুমূৰ্ত্তি ৷
প্ৰধানমন্ত্ৰীগৰাকীৰ লগত এক বৃহৎ ব্যৱসায়ীৰ প্ৰতিনিধি দল ব্ৰাজিলত উপস্থিত হোৱাৰ সম্ভাৱনা আছে ৷ বিশেষকৈ BRICSৰ ব্যৱসায়ী বৈঠকত অংশগ্ৰহণ কৰাৰ উদ্দেশ্যে উপস্থিত থাকিব দলটো ৷
লগতে পঢ়কঃ মহাৰাষ্ট্ৰৰ পলিটিকেল ড্ৰামাঃ আজি কংগ্ৰেছ-এন চি পিৰ বৈঠকৰ সম্ভাৱনা !
সমগ্ৰ বিশ্বৰ অৰ্থনৈতিক ক্ষেত্ৰখনত গুৰুত্বপূৰ্ণ ভূমিকা গ্ৰহণ কৰা ব্ৰাজিল,ৰাছিয়া,ভাৰত,চীন আৰু দক্ষিণ আফ্ৰিকাক লৈ গঠন কৰা হৈছিল BRICS ৷ বিশ্বৰ সৰ্বমুঠ জনসংখ্যাৰ প্ৰায় 42 শতাংশ,বিশ্ব বাণিজ্যত প্ৰায় 17 শতাংশ আৰু বিশ্বত উৎপাদিত সামগ্ৰীৰ প্ৰায় 23 শতাংশত অংশীদাৰত্ব আগবঢ়ায় BRICSত অন্তৰ্ভুক্ত দেশকেইখনে ৷
উল্লেখ্য যে,দুদিনীয়া কাৰ্যসূচীৰে আগন্তুক 13 আৰু 14 নৱেম্বৰত ব্ৰাজিলত অনুষ্ঠিত হ'ব BRICS সন্মিলন ৷
