নিউজ ডেস্ক, 23 জুনঃ দেশবাসীৰ বাবে ডাঙৰ খবৰ । প্ৰথমবাৰৰ বাবে কৰ'ণা ভাইৰাছৰ আয়ুৰ্বেদিক ঔষধ মুকলি ভাৰতৰ প্ৰসিদ্ধ আয়ুৰ্বেদিক কোম্পানী পতঞ্জলিৰ । মঙলবাৰে হাৰিদুৱাৰৰ পতঞ্জলি যোগপীঠত দিনৰ 1 বজাত মুকলি কৰা হয় "কৰ'নিল" নামৰ প্ৰথমটো আয়ুৰ্বেদিক ঔষধৰ ।
সোমবাৰে পতঞ্জলিৰ মুখ্য কাৰ্যবাহী বিষয়া আচাৰ্য বালকৃষ্ণই টুইট কৰি কৰ'ণা ভাইৰাছৰ প্ৰথমটো সৰ্বাধিক প্ৰমাণভিত্তিক আয়ুৰ্বেদিক ঔষধ #স্বাচাৰি_ভাটি, #কৰ'নিলৰ উদ্বোধন মঙলবাৰে 12 টা বজাত কৰা হ'ব জানিবলৈ দিছিল ।
ইয়াৰ পূৰ্বে প্ৰতিষ্ঠানটোৰ কাৰ্যবাহী আচাৰ্য বালকৃষ্ণই এই ঔষধৰ নিয়মিত সেৱনৰ পাচত 5 ৰ পৰা 14 দিনৰ ভিতৰতেই COVID-১৯ ৰ পৰা আৰোগ্য লাভ কৰিব পৰা যাব বুলি দাবী উত্থাপন কৰিছিল ।
তেওঁ কৈছিল, COVID-১৯ প্ৰাদুৰ্ভাৱৰ পাচত আমি বিজ্ঞানীৰ এটি দল নিযুক্ত কৰিছিলো । তাৰ পাচতেই বহু গৱেষণাৰ পাচত 100 গৰাকী COVID-১৯ ৰোগীৰ ক্লিনিকেল কেছ ষ্টাডি কৰি এশ শতাংশই অনুকূল ফলাফল পাবলৈ সক্ষম হৈছিলো । আমাৰ ঔষধ সেৱন কৰাৰ পাচতেই 5 ৰ পৰা 14 দিনৰ ভিতৰত COVID-১৯ ৰ ফলাফল নিগেটিভ পোৱা গৈছিল । 4-5 দিনৰ ভিতৰতেই তথ্য়, প্ৰমাণ সমূহ মুকলি কৰা হ'ব ।
আনহাতে যোগ কৰি নিজকে সুস্থ ৰাখি উপযুক্ত খাদ্য-প্ৰণালীৰে প্ৰতিৰোধ ক্ষমতাও বৃদ্ধি কৰিব পাৰি বুলিও কয় বালকৃষ্ণই । এই মুকলি অনুষ্ঠানত গৱেষক, বিজ্ঞানী, চিকিৎসক সকলো উপস্থিত থকাৰ লগতে যোগ গুৰু বাবা ৰামদেৱও উপস্থিত থকাৰ কথা জানিব পৰা যায় ।
