নিউজ ডেস্ক, 31 মাৰ্চঃ ভাৰতৰ সৈতে সৃষ্টি হোৱা উত্তেজনাপূৰ্ণ পৰিস্থিতি সন্দৰ্ভত পাকিস্তানৰ সাংসদৰ সৈতে আলোচনাত বহিব দেশখনৰ সেনা প্ৰধান ৷ সংবাদ মাধ্যম ANI এ প্ৰকাশ কৰিছে এই কথা ৷
সেই অনুসৰি পাকিস্তানৰ সেনাপ্ৰধান জেন. কমৰ জাবেদ বাজৱাই দেশখনৰ সংসদৰ সকলো সদস্যকে সম্বোধন কৰিব ৷ পাকিস্তান সেনাৰ মুখ্যালয়ত অহা 4 এপ্ৰিলত অনুষ্ঠিত হ'বলগীয়া আলোচনাত দেশখনৰ বিৰোধী দলকে ধৰি শাসনাধিষ্ঠিত দলৰ সকলো সাংসদকে ধৰি প্ৰতিৰক্ষা বিভাগৰ ছিনেটৰ সকলে অংশগ্ৰহণ কৰিব ৷
ৰাৱালপিণ্ডিৰ সেনা মুখ্যালয়ত অনুষ্ঠিত হ'বলগীয়া আলোচনাত দেশখনৰ প্ৰাক্তন মন্ত্ৰীসকলেও অংশগ্ৰহণ কৰিব বুলি প্ৰকাশ কৰিছে সংবাদ প্ৰতিষ্ঠানটোৱে ৷ বিগত কেইমাহমান ধৰি ভাৰতৰ সৈতে সৃষ্টি হোৱা উত্তেজনাপূৰ্ণ পৰিস্থিতি সন্দৰ্ভত দেশখনৰ কেবিনেটক সম্বোধন কৰিব সেনাপ্ৰধান জেন. বাজৱাই ৷ দেশখনৰ নেশ্বনেল এছেম্বলিৰ অধ্যক্ষ আমজাদ আলী খানৰ সভাপতিত্বত অনুষ্ঠিত হ'বলগীয়া এই সভাত দেশখনৰ প্ৰাক্তন প্ৰতিৰক্ষামন্ত্ৰী পাৰভেজ খাট্টাকেও অংশগ্ৰহণ কৰিব ৷
