নিউজ ডেস্ক, ১৯ জুনঃ শুকুৰবাৰে পুৱা ভাগত শ্বহীদ দীপক সিঙৰ মৃতদেহ মধ্য প্ৰদেশৰ ৰেৱা জিলাত উপস্থিত হ'ব বুলি জানিবলৈ দিয়ে এগৰাকী ভাৰতীয় সেনা বিষয়াই । তাৰোপৰি শ্বহীদ সেনা গৰাকীৰ মৃতদেহ বৃহস্পতিবাৰে সন্ধিয়া লেহৰ পৰা প্ৰয়াগৰাজলৈ হৈ অহা হয় বুলি উল্লেখ কৰে । তাৰ পৰাই শুকুৰবাৰে পুৱা শ্বহীদ গৰাকীৰ মৃতদেহ সৈন্যৰ সৈতে অন্তিম সৎকাৰৰ বাবে নিজ গাঁৱলৈ লৈ যোৱা হ'ব বুলি জানিবলৈ দিয়ে সেনা বিষয়া গৰাকীয়ে ।
উল্লেখ্য যে, বিগত ১৫ জুনত পূৱ লাডাখত চীনৰ সৈতে হোৱা সংঘৰ্ষত শ্বহীদ হোৱা ভাৰতীয় সেনাৰ ২০ গৰাকী সৈনিকৰ ভিতৰত এজন আছিল শ্বহীদ দীপক সিং ।
আনহাতে, শ্বহীদ দীপক সিঙক শ্ৰদ্ধাঞ্জলি জনাই মধ্য় প্ৰদেশৰ মুখ্যমন্ত্ৰী শিৱৰাজ সিং চৌহানে ৷ ইয়াৰোপৰি, শ্বহীদ গৰাকীৰ পৰিয়াললৈ ১ কোটি টকাৰ আৰ্থিক সাহাৰ্য প্ৰদান কৰাৰ লগতে এটা পকী ঘৰ নিৰ্মাণ কৰি দিয়া হ'ব বুলি সদৰি কৰে । লগতে মুখ্যমন্ত্ৰী গৰাকীয়ে কয় যে, দেশৰ সুৰক্ষাৰ বাবে নিজৰ জীৱন ত্যাগ কৰি অহা আমাৰ বীৰ সৈনিকসকলৰ বলিদানক শত কোটি প্ৰণাম ।
তাৰোপৰি, দীপক সিঙৰ পৰিয়ালৰ এজন সদস্যক চৰকাৰী চাকৰি প্ৰদান কৰা হ'ব বুলিও ঘোষণা কৰে মুখ্যমন্ত্ৰী শিৱৰাজ সিঙ চৌহানে ।
২০১৩ চনত সেনা বাহিনীত ভৰ্তি হোৱা শ্বহীদ দীপক সিং বিহাৰ ৰেজিমেণ্টৰ সৈতে লাডাখৰ গালৱানত কৰ্মৰত আছিল । ২০১৯ চনত বিবাহপাশত আৱদ্ধ হৈছিল জোৱানজন । আনহাতে, শ্বহীদ দীপক সিঙৰ পিতৃ গজৰাজ সিং এজন কৃষক হোৱাৰ বিপৰীতে জ্যেষ্ঠ ভাতৃ প্ৰকাশ সিঙো সেনা জোৱান হিচাপে কৰ্মৰত বুলি জানিবলৈ দিয়ে পৰিয়ালৰ লোকে ৷
লগতে পঢ়ক : তিন মূৰ্তি চৌকৰ পৰা চীনা দূতাবাসলৈ চীন বিৰোধী প্ৰতিবাদ
