নিউজ ডেস্ক, ২৬ জুনঃ বিহাৰ আৰু উত্তৰ প্ৰদেশত বৃহস্পতিবাৰে বজ্ৰপাতৰ ফলত মৃত্যু হয় মুঠ ১০৮ গৰাকী লোকৰ । বৃহস্পতিবাৰে ৰাজ্য দুখনৰ ভিন্ন প্ৰান্তত মুশলধাৰ বৰষুণ, বতাহৰ লগতে বজ্ৰপাত পৰে । যাৰ ফলত বিহাৰত ৮৩ গৰাকীকৈ ব্যক্তি বজ্ৰপাত পৰি নিহত হোৱাৰ উপৰিও উত্তৰ প্ৰদেশতো ২৫ গৰাকীকৈ ব্যক্তিৰ মৃত্যু হয় । লগতে বহু কেইগৰাকী লোক গুৰুতৰভাৱে আহত হয় বুলিও সদৰি কৰে প্ৰশাসনে ।
বিহাৰৰ গোপালগঞ্জত বজ্ৰপাত পৰি ১৩ গৰাকী লোকৰ মৃত্যু হোৱাৰ বিপৰীতে ছীৱান জিলাত মৃত্যু হয় ৫ গৰাকী লোকৰ । বিহাৰৰ ভিন্ন অঞ্চলত মুঠ ৮৩ গৰাকী লোকৰ বজ্ৰপাত পৰি মৃত্যু হয় বুলি সদৰি কৰে ৰাজ্য চৰকাৰে ।
আনহাতে, উত্তৰ প্ৰদেশত বজ্ৰপাত পৰি ২৫ গৰাকীকৈ লোকৰ মৃত্যু সন্দৰ্ভত শোক প্ৰকাশ কৰে মুখ্যমন্ত্ৰী যোগী আদিত্যনাথে । লগতে মৃত্যু হোৱা ২৫ গৰাকীকৈ ব্যক্তিৰ পৰিয়ালক চাৰি লাখকৈ আৰ্থিক সাহাৰ্য প্ৰদান কৰিব বুলিও সদৰি কৰে মুখ্যমন্ত্ৰী গৰাকীয়ে । তাৰোপৰি উত্তৰ প্ৰদেশৰ ৰাজ্যপাল আনন্দীৱেন পেটেলে ঘটনা সন্দৰ্ভত শোক প্ৰকাশ কৰাৰ লগতে বজ্ৰপাত পৰি অকাল মৃত্যুক সাৱটা ব্যক্তিৰ পৰিয়াললৈ সমৱেদনা জ্ঞাপন কৰে । লগতে আহত সকলক উন্নত চিকিৎসা প্ৰদান কৰিবলৈ নিৰ্দেশ দিয়ে ।
লগতে পঢ়ক : নাওকটাত দুৰ্ঘটনাত পতিত ৰাজনৈতিক নেতাৰ বাহন
