নিউজ ডেস্ক, 8 জানুৱাৰীঃ বুধবাৰে পুৱতি নিশা আমেৰিকাক প্ৰত্যুত্তৰ দি ইৰাকত থকা 2টা মাৰ্কিন সামৰিক ঘাটিত মিছাইল আক্ৰমণ চলালে ইৰাণে ৷ 3 জানুৱাৰীত আমেৰিকাই এয়াৰ ষ্ট্ৰাইকৰ জৰিয়তে ইৰানৰ সামৰিক জেনেৰেল কাচিম চুলেইমানি হত্যা কৰাৰ বাবে ইৰাণে প্ৰতিশোধ ল'বলৈ এই সংঘটিত কৰে ৷
উল্লেখ্য যে, ৰাষ্ট্ৰপতি ডনাল্ড ট্ৰাম্পে একপক্ষীয়ভাৱে বিশ্ব শক্তিৰ সৈতে তেহৰানৰ পাৰমাণৱিক চুক্তিৰ পৰা আমেৰিকাক প্ৰত্যাহাৰ কৰাৰ সিদ্ধান্তৰ পাচতে বিগত কিছু মাহৰ পৰা মধ্যপ্ৰাচ্যত ক্ৰমাগতভাৱে উত্তেজনা বৃদ্ধি পাইছিল ৷ এই উত্তেজনাৰ পৰিস্থিতিও ইৰানৰ দ্বাৰা বুধবাৰে কৰা এই মিছাইল আক্ৰমণৰ মূল কাৰণ ৷ কিন্তু ইৰানীয়ান সংবাদমাধ্যমে জনোৱা অনুসৰি আমেৰিকাই সামৰিক জেনেৰেল কাচিম চুলেইমানি হত্যা কৰাৰ প্ৰতিশোধ ল'বলৈ ইৰাণে এই আক্ৰমণ চলায় ৷ মঙলবাৰে চুলেইমানিৰ গৃহ চহৰ কেৰমানত তেওঁৰ মৃতদেহ লৈ এক সমদল উলাওৱা হয় আৰু সমদলত ভাগ লোৱা লোক সকলে তেওঁৰ মৃত্যুৰ প্ৰতিশোধ ল'বলৈ দাবী উত্থাপন কৰে ৷ এই সমদলৰ কিছু ঘন্টাৰ পাচতে ইৰাণে এই মিছাইল আক্ৰমণ কৰে ৷ চুলেইমানিৰ হত্যা আৰু ইৰাণৰ দ্বাৰা মিছাইলৰ আক্ৰমণে বিগত কিছু বৰ্ষৰ পৰা প্ৰথম বাৰৰ বাবে এই কথা প্ৰতিয়মান কৰে যে, ওৱাশিংটন আৰু তেহৰানে পৰোক্ষ ভাৱে আক্ৰমণ কৰাতকৈ প্ৰত্যক্ষভাৱে আক্ৰমণ কৰিছে ৷ এই ঘটনাৰ বাবে দুয়োখন ৰাষ্ট্ৰৰ মাজত মুকলি সংঘৰ্ষৰ সম্ভাৱনা বৃদ্ধি পাইছে ৷ ইৰানৰ 1979ৰ ইছলামিক ক্ৰান্তিৰ পাচৰে পৰা দুয়োখন ৰাষ্ট্ৰ শত্ৰু আছিল ৷
মাৰ্কিন বিষয়াই দুয়োটা ষ্ট্ৰাইকক নিশ্চিত কৰে যদিও ইৰানে কেৱল এটা সামৰিক ঘাটিতহে আক্ৰমণ কৰাৰ কথা স্বীকাৰ কৰে ৷ লগতে আমেৰিকাই ইৰাকৰ কুৰ্দ ক্ষেত্ৰস্থিত ইৰবিলত আন এটা মিছাইল আক্ৰমণৰ কথাও স্বীকাৰ কৰে ৷ অৱশ্যে বুধবাৰৰ এই আক্ৰমণত আমেৰিকাই কোনো হতাহতিৰ বিষয়ে উল্লেখ কৰা নাই যদিও ইৰানীয়ান সংবাদ মাধ্যমৰ তথ্য অনুসৰি ইৰাকত হোৱা এই মিছাইল আক্ৰমণত 80 জন মাৰ্কিন সেনা নিহত হয় ৷ ইপিনে ইৰাকৰ মাৰ্কিন সামৰিক ঘাটিত মিছাইল আক্ৰমণ সংঘটিত কৰাৰ পাচতে ইৰানৰ বৈদেশিক মন্ত্ৰী জাভেদ জাৰিফে মন্তব্য কৰে যে, আমেৰিকাই ইৰানৰ সাধাৰণ নাগৰিক আৰু বিষয়া সকলক সামৰিক আক্ৰমণ চলাইছে ৷ সেয়ে ৰাষ্ট্ৰসংঘৰ চনদৰ 51 নং অনুচ্ছেদ অনুসৰি ইৰানে আত্মৰক্ষাৰ বাবে এই পদক্ষেপ গ্ৰহণ কৰিছে ৷
লগতে পঢ়ক - ইৰান সন্দৰ্ভত আমেৰিকাৰ ৰাষ্ট্ৰপতিক সাৱধানবাণী ইউনেস্ক'ৰ
