নতুন দিল্লী,9 এপ্ৰিলঃ ভাৰতীয় বাতৰি কাকত সমাজে বুধবাৰে কংগ্ৰেছৰ সভানেত্ৰী ছোনিয়া গান্ধীয়ে আগবঢ়োৱা চৰকাৰী আৰু ৰাজহুৱা খণ্ডৰ বিজ্ঞাপনৰ ক্ষেত্ৰত দুই বছৰৰ প্ৰতিবন্ধকতা বিষয়ক পৰামৰ্শ অস্বীকাৰ কৰিছে ৷ ভাৰতীয় বাতৰি কাকত সমাজ চমুকৈ আই এন এছে সংবাদ মাধ্যমৰ জীৱন আৰু স্বাধীনতাৰ ওপৰত ভিত্তি কৰি এই কথা প্ৰকাশ কৰে ৷ প্ৰধানমন্ত্ৰী মোদীলৈ প্ৰেৰণ কৰা এক পত্ৰত গান্ধীয়ে Covid 19 ৰ বিৰুদ্ধে যুঁজিবলৈ বিভিন্ন পৰামৰ্শ আগবঢ়াইছিল ৷ ইয়াৰ লগতে চৰকাৰ আৰু ৰাজহুৱা খণ্ডৰ দ্বাৰা প্ৰকাশিত ছপা,বৈদ্যুতিন আৰু অনলাইন মাধ্য়মত প্ৰকাশিত বিজ্ঞাপনৰ ক্ষেত্ৰত দুবছৰলৈ প্ৰতিবন্ধকতা আৰোপ কৰাৰ বিষয়ে উল্লেখ কৰা হৈছিল ৷ আই এন এছৰ অধ্যক্ষ শৈলেশ গুপ্তাই বিষয় সন্দৰ্ভত এক বিবৃতিৰ জৰিয়তে এই প্ৰস্তাৱৰ কথা উল্লেখ কৰি আশ্চৰ্য প্ৰকাশ কৰাৰ লগতে গৰিহণা দিয়ে ৷ চৰকাৰী ধনৰ ব্যয়ৰ বিষয়ে কব লাগিলে এয়া যথেষ্ঠ ক্ষুদ্ৰ অংশ কিন্তু কাকত উদ্যোগৰ বাবে এয়া বৃহৎ ৰাশি বুলি বিবৃতিটোত প্ৰকাশ কৰা হৈছে ৷ যি এক জীৱন্ত গণতন্ত্ৰৰ বাবে নিঃসন্দেহে প্ৰয়োজনীয়, যাৰ জৰিয়তে জীয়াই থাকিবলৈ সংগ্ৰাম চলাব পাৰি ৷
ভিন্ন প্ৰকাৰৰ সংবাদ মাধ্যমসমূহৰ ভিতৰত একমাত্ৰ ছপা মাধ্যমৰহে বেতন ব’ৰ্ড আছে য’ত চৰকাৰে কৰ্মচাৰীসকলৰ বেতন নিৰ্ধাৰণ কৰি থৈছে ৷ ই এনেকুৱা এটা উদ্যোগ যাৰ মূল্য বজাৰৰ দামেৰে নিৰ্ধাৰণ কৰিব নোৱাৰি ৷ ই চৰকাৰৰ এক নৈতিক দায়িত্ব ৷ ডিজিটেল মেডিয়াৰ সম্প্ৰসাৰণৰ বাবে ইতিমধ্যে কাকতৰ বিজ্ঞাপন আৰু প্ৰচলনৰ ক্ষেত্ৰত যথেষ্ট সংকটৰ সৃষ্টি হৈছে ৷ ফলত কাকতৰ উদ্যোগসমূহত তীব্ৰ আৰ্থিক সংকটে দেখা দিছে ৷ এনে সময়তে জীৱনক তুচ্ছ জ্ঞান কৰি সংবাদকৰ্মীসকলে Covid 19 ৰ খবৰ সংগ্ৰহ কৰি জনতাৰ মাজত বিলাই আছে ৷ সেয়ে কংগ্ৰেছ নেত্ৰীগৰাকীৰ এনেকুৱা পৰামৰ্শই বিশ্বৰ সংবাদ মাধ্যমৰ ক্ষেত্ৰত গভীৰ সমস্যাৰ সৃষ্টি কৰিব ৷ তাৰ প্ৰতি লক্ষ্য ৰাখি নিউজ ব্ৰ’ডকাষ্ট এছ’চিয়েছনে (এন বি এ) কংগ্ৰেছ নেত্ৰীগৰাকীৰ এনে পৰামৰ্শ প্ৰত্যাখ্যান কৰে ৷ লগতে এই পৰামৰ্শ ঘূৰাই ল'বলৈ গান্ধীক আহ্বান জনায় সংস্থাটোৱে ৷
