স্পৰ্টছ ডেস্ক, 21 নৱেম্বৰ: 22 নৱেম্বৰৰ পৰা 26 নৱেম্বৰলৈ ভাৰত-বাংলাদেশৰ মাজত অনুষ্ঠিত হ’ব দিবা-নৈশ টেষ্ট মেচ ৷ কলকাতাৰ ইডেন গাৰ্ডেনত দিনৰ 1 বজাৰ পৰা অনুষ্ঠিত হ’ব এই ঐতিহাসিক টেষ্ট মেচখন ৷
আন্তঃৰাষ্ট্ৰীয় ক্ৰিকেটত দিবা-নৈশ টেষ্ট মেচ অথবা পিংক বল টেষ্ট মেচ নতুন কথা নহয় যদিও পোন প্ৰথমবাৰৰ বাবে ভাৰত আৰু বাংলাদেশ দলটো অৱতীৰ্ণ হ’ব দিবা-নৈশ টেষ্ট মেচত ৷ ইতিমধ্যে মেচখনক লৈ সকলো প্ৰস্তুতি বিচিচিআইয়ে সম্পূৰ্ণ কৰাৰ লগতে মেচখনৰ টিকট বিক্ৰী হোৱা বুলি জানিব পৰা গৈছে ৷ আন্তঃৰাষ্ট্ৰীয় টেষ্ট ক্ৰিকেটত এইখন হ’ব 12 সংখ্যক দিবা-নৈশ মেচ ৷ আনহাতে ইয়াৰ পূৰ্বে ভাৰতে পিংক তথা গোলপীয়া বলৰ সলনি ৰঙা লেডাৰ বলৰ টেষ্ট মেচত অৱতীৰ্ণ হৈছে ৷ সেয়ে ভাৰতীয় ক্ৰিকেট দলটোৰ বাবেও এই মেচখন হ’ব অধিক গুৰুত্বপূৰ্ণ ৷
আন্তঃৰাষ্ট্ৰীয় টেষ্ট ক্ৰিকেটত প্ৰথমবাৰৰ বাবে দিবা-নৈশ টেষ্ট মেচ হৈছিল 2015 চনৰ 27 নৱেম্বৰৰ পৰা 1 ডিচেম্বৰলৈ ৷ নিউজিলেণ্ড আৰু অষ্ট্ৰেলিয়াৰ মাজত হোৱা মেচখনত অষ্ট্ৰেলিয়াই 4 উইকেটত জয় লাভ কৰিবলৈ সক্ষম হৈছিল ৷
আন্তঃৰাষ্ট্ৰীয় ক্ৰিকেটত তিনিটাকৈ কোম্পানীয়ে বল নিৰ্মাণ কৰি আহিছে ৷ তাৰ ভিতৰত আছে- এছ জি, ডিয়ুক আৰু কুকাবুৰা ৷ এতিয়া ভাৰতত হ’বলগীয়া প্ৰথমখন দিবা নৈশ টেষ্টৰ বাবে SG কোম্পানীক পিংক বল নিৰ্মাণৰ দায়িত্ব দিয়া হৈছে ৷
এতিয়া লক্ষ্যণীয় হ’ব এই ঐতিহাসিক মেচখনত কোনে বিজয়ৰ শেষ মাৰিবলৈ সক্ষম হ’ব ৷ মেচখনত বাংলাদেশৰ প্ৰধানমন্ত্ৰী শ্বেখ হাছিনাৰ লগতে পশ্চিমবংগৰ মুখ্যমন্ত্ৰী মমতা বেনাৰ্জীকে ধৰি বহু নামি-দামী খেলুৱৈ উপস্থিত থাকিব ৷
লগতে চাওক-সোণোৱালৰ আহ্বান মৰ্মে NRLৰ ব্যক্তিগতকৰণ কৰা নহয়: ধৰ্মেন্দ্ৰ প্ৰধান
