নেশ্বনেল ডেস্ক, 5 জানুৱাৰীঃ 2016 চনৰ বিমুদ্ৰাকৰণৰ পিচত ভাৰতীয় বায়ুসেনাই দেশবাসীৰ বাবে সৰবৰাহ কৰিছিল 625 টন নতুন নোট ৷ মুম্বাইস্থিত সৰ্বভাৰতীয় প্ৰযুক্তিবিদ্যা প্ৰতিষ্ঠান, বোম্বাইৰ টেকফেষ্ট অনুষ্ঠানত অংশগ্ৰহণ কৰি এই কথা প্ৰকাশ কৰে ভাৰতীয় বায়ুসেনাৰ প্ৰাক্তন এয়াৰ চীফ মাৰ্শ্বাল বিএছ ধানোৱাই ৷ অনুষ্ঠানত অংশগ্ৰহণ কৰি প্ৰাক্তন এয়াৰ চীফ মাৰ্শ্বালগৰাকীয়ে কয় যে, "যেতিয়া বিমুদ্ৰাকৰণ হৈছিল, ভাৰতীয় বায়ু সেনাই দেশবাসীৰ বাবে টকাৰ নোটসমূহ সৰবৰাহ কৰিছিল ৷ যদি এক কোটি টকা 20 কিলোগ্ৰাম ওজনৰ বেগত আহে, মই নাজানো কিমান কোটি টকা আমি সৰবৰাহ কৰিছিলো ৷" অনুষ্ঠানত প্ৰাক্তন এয়াৰ চীফ মাৰ্শ্বালগৰাকীয়ে দেখুওৱা অনুসৰি, সেই সময়ত ভাৰতীয় বায়ুসেনাই 33টাকৈ অভিযান নেতৃত্ব দি সৰ্বমুঠ 625 টন ওজনৰ টকাৰ বেগ দেশৰ বিভিন্ন প্ৰান্তলৈ সৰবৰাহ কৰিছিল ৷
লগতে পঢ়কঃ নতুন সেনা প্ৰধান হিচাপে মনোজ মুকুন্দ নাৰাৱানেৰ কাৰ্যভাৰ গ্ৰহণ
উল্লেখ্য যে, 2016 চনৰ 8 নৱেম্বৰ তাৰিখে দেশৰ প্ৰধানমন্ত্ৰী নৰেন্দ্ৰ মোডীয়ে 500 আৰু 1000 টকীয়া নোটসমূহ অবৈধ ঘোষণা কৰি বিমুদ্ৰাকৰণ ঘোষণা কৰিছিল ৷ এয়াৰ চীফ মাৰ্শ্বাল বিএছ ধানোৱাই 2016 চনৰ 31 ডিচেম্বৰৰ পৰা 2019 চনৰ 30 ছেপ্টেম্বৰলৈ ভাৰতীয় বায়ুসেনাক নেতৃত্ব প্ৰদান কৰিছিল ৷
লগতে পঢ়কঃ সৈন্য বাহনীয়ে নিজকে ৰাজনীতিৰ পৰা আঁতৰত ৰাখেঃ চিডিএছ বিপিন ৰাৱাট
অনুষ্ঠানত অংশগ্ৰহণ কৰি ৰাফেল চুক্তি সন্দৰ্ভত নিজৰ প্ৰতিক্ৰিয়া প্ৰকাশ কৰি ধানোৱাই কয় যে, প্ৰতিৰক্ষা সম্পদ অধিগ্ৰহণৰ ক্ষেত্ৰত হোৱা দেৰিয়ে দেশৰ সুৰক্ষা বাহিনীসমূহৰ সক্ষমতাত বিৰূপ প্ৰভাৱ পেলায় ৷ ৰাজীৱ গান্ধীৰ চৰকাৰৰ সময়ত হোৱা বফৰ্চ চুক্তিক লৈয়ো বিতৰ্কৰ সূচনা হৈছিল যদিও কাৰ্গিল যুদ্ধৰ সময়ত বফৰ্চ টোপে নিজৰ শক্তি প্ৰদৰ্শন কৰি শত্ৰুক উচিত প্ৰত্যুত্তৰ দিবলৈ সক্ষম হৈছিল ৷ তেওঁ লগতে উল্লেখ কৰে যে, যদিহে বালাকোট ষ্ট্ৰাইকৰ পিচত ভাৰত-পাকিস্তানৰ মাজত উদ্ভৱ হোৱা পৰিস্থিতিত ৱিং কামাণ্ডাৰ অভিনন্দনে মিগ 21ৰ পৰিৱৰ্তে ৰাফেল যুদ্ধবিমান ব্যৱহাৰ কৰিলে ইয়াৰ পৰিমাণ অধিক ফলপ্ৰসূ হ'লহেতেন ৷
