তেলেংগানা,29 ডিচেম্বৰ: নতুন লক্ষণৰ COVID-19ৰ প্ৰথম জন ৰোগী তেলেংগানাত চিনাক্ত হৈছে । ডিচেম্বৰ মাহৰ ১০তাৰিখে আমেৰিকাৰ পৰা তেলেংগানালৈ অহা এজন ৪৯ বছৰীয়া ব্যক্তিৰ দেহত নতুন COVID-19 ধৰা পৰিছে। অৱশ্যে,স্বাস্থ্য বিভাগৰ বিষয়াসকলে এতিয়াও ইয়াক নিশ্চিত কৰিব পৰা নাই।
তথ্য অনুসৰি,তেলেংগানাৰ ৱাৰাংগালৰ এজন লোকৰ দেহত ১৬ ডিচেম্বৰত ক'ভিডৰ লক্ষণ ধৰা পৰিছিল ৷ তাৰ পাচতে পৰীক্ষা কৰাত ফলাফল পজিটিভ পোৱা যায়। সম্প্ৰতি ৱাৰাংগালৰ এখন ব্যক্তিগত চিকিৎসালয়ত চিকিৎসা কৰি থকা হৈছে ৰোগীজনক । ইতিমধ্যে,স্বাস্থ্য বিভাগৰ বিষয়াসকলে ব্যক্তিজনৰ সংস্পৰ্শলৈ অহা লোকসকলৰ তালিকা প্ৰস্তুত কৰি তেওঁলোকৰ স্বাস্থ্য পৰীক্ষা কৰাৰ ব্যৱস্থা কৰা হৈছিল ৷ পৰীক্ষাৰ অন্তত ব্যক্তিজনৰ ৭১ বছৰীয়া মাতৃয়েও আক্ৰান্ত হোৱাৰ তথ্য পোহৰলৈ আহে ৷
সোমবাৰে এক আনুষ্ঠানিক ঘোষণাৰ জৰিয়তে তেলেংগানা স্বাস্থ্য বিভাগে জনস্বাস্থ্য বিভাগৰ নিৰ্দেশক জি শ্ৰীনিৱাস ৰাওক পৰীক্ষা আৰু চিকিৎসাৰ নীতি অনুসৰণ কৰিবলৈ নিৰ্দেশ প্ৰদান কৰিছে ৷ তাৰ লগে লগে তেলেংগানাৰ ৰাজ্যপাল তামিলীছাই চাউন্দৰাৰাজনে ৰাজ্যখনৰ লোক সকলক উদ্দেশ্যি কয় যে বিদেশত দ্ৰুত গতিত বিয়পি থকা COVID-19ৰ নতুন লক্ষণক লৈ সকলোৱে সাৱধানতা অৱলম্বন কৰা উচিত। শাৰীৰিক দূৰত্ব বজাই ৰখা,হাত ধোৱা আৰু মাস্ক পৰিধান কৰি সকলো সতৰ্কতামূলক ব্যৱস্থা অনুসৰণ কৰিবলৈ অনুৰোধ জনাইছে ৰাজ্যপাল গৰাকীয়ে ৷
লগতে পঢ়ক: অসমত দ্বিতীয় দিনা আৰম্ভ হৈছে ক'ৰণা প্ৰতিষেধকৰ পৰীক্ষণ
