এনআৰচিঃ দিল্লীত আক্ৰাছু নেতাৰ হুংকাৰ

ৰাষ্ট্ৰীয় নাগৰিকপঞ্জীক লৈ তীব্ৰ প্ৰতিবাদ সাব্যস্ত কৰাৰ হুংকাৰ সদৌ অসম কোঁচ-ৰাজবংশী ছাত্ৰ সন্থাৰ ৷ ইতিমধ্যে নতুন দিল্লীত বাহৰ পাতি থকা সংগঠনটোৰ শীৰ্ষ নেতৃত্বৰ লগতে বহুটো কৰ্মী তথা সদস্যই প্ৰধানমন্ত্ৰী নৰেন্দ্ৰ মোডীক এখন স্মাৰক পত্ৰও প্ৰদান কৰে ৷

নতুন দিল্লী, 30 ছেপ্টেম্বৰঃ সদ্য প্ৰকাশিত ৰাষ্ট্ৰীয় নাগৰিকপঞ্জীক লৈ ৰাজ্যত প্ৰতিবাদ অব্যাহত থকাৰ সময়তে সোমবাৰে প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰীক পৃথকে পৃথকে স্মাৰক পত্ৰ প্ৰদান কৰে আক্ৰাছুৰ শীৰ্ষ নেতৃত্বই৷

বিগত আগষ্ট মাহৰ 31 তাৰিখে প্ৰকাশ পোৱা ৰাষ্ট্ৰীয় নাগৰিকপঞ্জীৰ পৰা বাদ পৰিছিল প্ৰায় 19 লাখ লোকৰ নাম ৷ ইয়াৰে অধিকাংশই খিলঞ্জীয়া লোক হোৱাৰ লগতে ৰাজ্যৰ ওদালগুৰি জিলাৰ বহুটো কোঁচ-ৰাজবংশী লোকৰ নাম বাদ পৰিছিল এন আৰ চিৰ পৰা ৷

পৰৱৰ্তী সময়ত সংগঠনটোৱে ইয়াৰ বিৰুদ্ধে সমগ্ৰ ৰাজ্যতে ব্যাপক প্ৰতিবাদ গঢ়ি তুলিছিল ৷ সংগঠনটোৱে প্ৰকাশ কৰা অনুসৰি, 19 লাখৰ ভিতৰত প্ৰায় 56 হাজাৰ কোঁচ-ৰাজবংশী ৰাইজ আছে ৷ উল্লেখ্য যে, কোচ-ৰাজবংশীসকল হৈছে অসম, মেঘালয়, উত্তৰ বংগ, বিহাৰ আৰু ভূটান তথা নেপালৰ বাসিন্দা ৷

কোঁচ-ৰাজবংশীসকলে দীৰ্ঘদিন ধৰি পৃথক কমতাপুৰ ৰাজ্যৰ লগতে অনুসুচিত জনজাতিৰ মৰ্যাদা দিয়াৰ দাবী উত্থাপন কৰি আহিছে ৷ পৰৱৰ্তী সময়ত যদিহে কেন্দ্ৰীয় চৰকাৰে কোঁচ-ৰাজবংশীসকলৰ দাবী মানি নলয় তেতিয়াহ'লে অধিক শক্তিশালী আন্দোলন গঢ়ি তোলাৰ হুংকাৰ প্ৰদান কৰে ৷