নিউজ ডেস্ক, ১৩ এপ্ৰিলঃ সোমবাৰে গংগা নদীৰ পৰা উদ্ধাৰ হয় দুটা শিশুৰ মৃতদেহ । আনহাতে, বৰ্তমানেও আন এটি শিশুৰ উদ্ধাৰৰ বাবে অভিযান চলাই আছে আৰক্ষীয়ে । উদ্ধাৰ হোৱা মৃতদেহ দুটা উত্তৰ প্ৰদেশৰ ভদোহী জিলাৰ বুলি চিনাক্ত কৰে আৰক্ষীয়ে ।
উল্লেখ্য যে, উত্তৰ প্ৰদেশৰ ভদোহী জিলাৰ মঞ্জু নামৰ মহিলাগৰাকীয়ে স্বামী মৃদুল যাদৱৰ সৈতে কাজিয়াত লিপ্ত হৈ পৰিয়ালটোৰ তিনিটাকৈ শিশুক গংগা নৈত পেলাই দিয়ে বুলি জানিবলৈ দিয়ে আৰক্ষীয়ে ।
অভিযুক্ত মাতৃ মঞ্জু যাদৱে শিশুকেইটাক শনিবাৰে ৰাতি গংগা নৈত পেলাই দি দেওবাৰে পুৱা ভাগলৈ নৈ ঘাটত বহি থাকে । এনে সময়তে সন্দেহজনক অৱস্থাত মঞ্জু যাদৱক স্থানীয় ব্যক্তিয়ে প্ৰত্যক্ষ কৰি ঘটনা সন্দৰ্ভত আৰক্ষীক খবৰ দিয়ে ।
ঘটনা সন্দৰ্ভত স্বামী মৃদুল যাদৱে পত্নী মঞ্জু যাদৱৰ বিৰুদ্ধে গোচৰ ৰুজু কৰিছে আৰু গোচৰৰ ভিত্তিত আৰক্ষীয়ে ইতিমধ্যে গ্ৰেপ্তাৰ কৰে অভিযুক্ত মাতৃ মঞ্জু যাদৱক ।
আনহাতে, দেওবাৰে জিলা দণ্ডাধীশ ৰাজেন্দ্ৰ প্ৰসাদে কয় যে, মঞ্জু যাদৱ তথা পৰিয়ালটোৰ সকলো সদস্যই কৰ'ণা ভাইৰাছৰ বাবে দেশজুৰি দিয়া লকডাউনৰ বাবে খাদ্যৰ অভাৱত ভোগাৰ বাবেই মাতৃ গৰাকীয়ে এই পদক্ষেপ গ্ৰহণ কৰে ।
