নেশ্যনেল ডেস্ক,২০ আগষ্ট: মুৰাদাবাদ জিলাৰ তীৰ্থাঙ্কৰ মহাবীৰ বিশ্ববিদ্যালয়ৰ মেডিকেল ৱাৰ্ডত বুধবাৰে এগৰাকী ক'ভিড আক্ৰান্ত মহিলাই কৰিলে আত্মহত্যা । জিলা প্ৰশাসনে ইতিমধ্যে এটা ভিডিঅ' ফুটেজ প্ৰকাশ কৰিছে য'ত মহিলা গৰাকীয়ে এক সন্দেহজনক অৱস্থাত এখন খিৰিকীৰে জপিয়াই দিয়া দেখিবলৈ পোৱা গৈছে ।
ঘটনা সন্দৰ্ভত আৰক্ষীৰ অপৰাধ শাখাৰ অধীক্ষক অশোক কুমাৰে সাংবাদিকৰ আগত দিয়া ভাষ্য অনুসৰি, ক'ভিড-১৯ত আক্ৰান্ত মহিলা গৰাকীক তীৰ্থাঙ্কৰ মহাবীৰ বিশ্ববিদ্যালয়ৰ মেডিকেল ৱাৰ্ডত ভৰ্তি কৰোৱা হৈছিল । এই গৰাকী মহিলাই বুধবাৰে চিকিৎসালয়ৰ ৱাৰ্ডৰ পৰা খিৰিকীৰে জপিয়াই আত্মহত্যা কৰিছে । ইতিমধ্যে আমি ঘটনা সন্দৰ্ভত তদন্ত আৰম্ভ কৰিছো ।
আৰক্ষী অধীক্ষক গৰাকীয়ে জনালে, ঘটনা সংঘটিত হোৱাৰ পিছতে মেডিকেল ৱাৰ্ডৰ পৰা আমাক অৱগত কৰা হৈছিল । ইয়াৰ পিছতে আমাৰ দল উপস্থিত হৈ ঘটনাস্থলীৰ পৰা চি চি টি ভিৰ ফুটেজ সংগ্ৰহ কৰাৰ লগতে আৰম্ভ কৰিছে তদন্ত প্ৰক্ৰিয়া ।
