চলন্ত গাড়ীত জুইঃ চাওক শিহৰণকাৰী দৃশ্য

শনিবাৰে অন্ধ্ৰ প্ৰদেশৰ চিট্তুৰত সংঘটিত হয় এক শোকাৱহ দুৰ্ঘটনা ৷ চলন্ত বাহনত অগ্নিসংযোগ হোৱাৰ ফলত নিহত হয় 5গৰাকী লোক ৷

নিউজ ডেস্ক, 14 চেপ্তেম্বৰঃ এক শিহৰণকাৰী দৃশ্য, যি দৃশ্য দেখিলে বুকু কপি উঠিব আপোনাৰ ৷ অন্ধ্ৰপ্ৰদেশৰ চিট্তুৰত শনিবাৰে পুৱাৰ ভাগত সংঘটিত হয় এই ঘটনা ৷

ঘটনা অনুসৰি, চলন্ত অৱস্থাতে কাৰিকৰী বিজুতি ঘটি জ্বলি উঠে এখন এছ ইউ ভি বাহন ৷ জুইৰ লেলিহান শিখাই মুহূৰ্ততে আৱৰি ধৰা বাহনখনত আছিল ছয়গৰাকী যাত্ৰী ৷ অন্ধ্ৰপ্ৰদেশৰ পালামানেৰৰ পৰা বেংগালুৰুলৈ বুলি গৈ থকা অৱস্থাতে বাহনখনত সংঘটিত হয় দুৰ্ঘটনাটো ৷ দুৰ্ঘটনাটোৰ ফলত বাহনখনত থকা পাঁচগৰাকী যাত্ৰী থিতাতে নিহত হোৱাৰ বিপৰীতে এগৰাকী যাত্ৰীয়ে প্ৰাণৰক্ষা কৰিবলৈ সক্ষম হয় ৷ আহত যাত্ৰীগৰাকীক স্থানীয় লোক আৰু অগ্নিনিৰ্বাপক বাহিনীৰ সহযোগত উদ্ধাৰ কৰি স্থানীয় চিকিৎসালয়ত ভৰ্তি কৰোৱা হয় ৷

বৰ্তমান সময়লৈকে জুই লগাৰ কাৰণ স্পষ্ট হোৱা নাই যদিও কাৰিকৰী বিজুতিৰ বাবেই অগ্নিকাণ্ডটো সংঘটিত হোৱা বুলি সন্দেহ প্ৰকাশ কৰিছে আৰক্ষীয়ে ৷ ঘটনাৰ বাবেই কিছুসময়ৰ বাবে বন্ধ হৈ পৰে ৰাষ্ট্ৰীয় ঘাইপথটো ৷