উত্তৰ প্ৰদেশ, 12 জুনঃ উত্তৰ প্ৰদেশত পোহৰলৈ আহিছে এক চাঞ্চল্য়কৰ ঘটনা । উত্তৰ প্ৰদেশৰ বালাৰামপুৰৰ উট্ৰাওলাত আৰক্ষী আৰু পৌৰ নিগমৰ কৰ্মচাৰীৰ দ্বাৰা এখন জাৱৰ কঢ়িওৱা বাহনত সন্দেহজনক COVID-১৯ আক্ৰান্ত ৰোগীৰ মৃতদেহ লৈ যোৱা ঘটনাৰ তদন্তৰ নিৰ্দেশ ।
ছ'চিয়েল মিডিয়াত সম্প্ৰতি ভাইৰেল হৈ পৰিছে আৰক্ষী আৰু পৌৰনিগমৰ কৰ্মচাৰীয়ে এখন জাৱৰ কঢ়িওৱা বাহনত মৃতদেহ কঢ়িয়াই নিয়া এটা ভিডিঅ' । ইয়াৰ পাচতেই বালৰামপুৰ আৰক্ষীয়ে ঘটনাটো সন্দৰ্ভত তদন্তৰ ঘোষণা কৰে ।
এই সন্দৰ্ভত বালৰামপুৰৰ আৰক্ষী অধীক্ষক দেৱ ৰঞ্জন বৰ্মাই কয়, COVID-১৯ ৰ শংকাৰ বাবেই এনে হ'ব পালে বুলি উল্লেখ কৰি মৃতদেহ কঢ়িওৱা লোক সকলে পিপিই কীট পৰিধান কৰিব লাগিছিল বুলি কয় । লগতে এই বিষয়ে তদন্ত চলি আছে আৰু সোনকালেই ইয়াৰ ওপৰত বিহিত ব্য়ৱস্থা গ্ৰহণ কৰা হ'ব বুলি জানিবলৈ দিয়ে ।
আৰক্ষী অধীক্ষকজনে লগতে কয়, এইয়া আৰক্ষী আৰু পৌৰ নিগম কৰ্মীৰ দ্বাৰা অসাৱধানতা আৰু অ-সংবেদনশীল কৰ্ম । মৃতদেহটো সংক্ৰমিত হ'লেও মৃতদেহ লৈ যোৱা লোক সকলে পিপিই কীট পৰিধান কৰা জৰুৰী আছিল বুলি কয় আৰক্ষী বিষয়াগৰাকীয়ে ।
বালাৰামপুৰৰ উট্ৰাওলাত সংঘটিত হৈছিল এই নাভুত-নাশ্ৰুত কাণ্ডটো । মৃত ব্যক্তিজন আনৱাৰ হিচাপে চিনাক্ত কৰা হৈছে । ইতিমধ্যে এই ঘটনা সন্দৰ্ভত জিলা প্ৰশাসন আৰু আৰক্ষী প্ৰশাসনে তিনিগৰাকী পৌৰনিগমৰ কৰ্মচাৰী আৰু তিনিগৰাকী আৰক্ষী কৰ্মীক নিলম্বিত কৰিছে ।
