নিউজ ডেস্ক, 29 আগষ্টঃ দুৰ্নীতিক লৈ মন্তব্য কৰি বিপদ পাটনা উচ্চ ন্যায়ালয়ৰ ন্যায়াধীশ ৰাকেশ কুমাৰ ৷ ইতিমধ্যে বিহাৰৰ মুখ্য ন্যায়াধীশে জাৰি কৰা নিৰ্দেশনাত পোহৰলৈ আহিছে এই তথ্য ৷ এগৰাকী জ্যেষ্ঠ সৰ্বভাৰতীয় অসামৰিক সেৱাৰ বিষয়াৰ এক গোচৰৰ শুনানিক লৈ বুধবাৰে ৰাজহুৱাভাৱে ন্যায়পালিকাৰ বিৰুদ্ধে দুৰ্নীতিৰ অভিযোগ উত্থাপন কৰিছিল ন্যায়াধীশগৰাকীয়ে ৷ বিহাৰৰ মুখ্য ন্যায়াধীশে তৎকালীনভাৱে ৰাকেশ কুমাৰে শুনানি লৈ থকা সকলো অভিযোগ তথা গোচৰ উঠাই লোৱাৰ লগতে পৰৱৰ্তী নিৰ্দেশনা জাৰি নকৰালৈকে তেওঁৰ সকলো কাম বন্ধ কৰি ৰখাৰ নিৰ্দেশ প্ৰদান কৰে ৷
ৰাকেশ কুমাৰে বুধবাৰে ৰাজহুৱাভাৱে বিহাৰৰ ন্যায়পালিকাত দুৰ্নীতি চলি থকাৰ কথা প্ৰকাশ কৰিছিল ৷ ইয়াৰ উপৰিও ৰাজ্যখনৰ সকলো নিম্ন আদালতত দু্ৰ্নীতিৰ দ্বাৰাই সকলো অভিযোগৰ শুনানি চলি থকাৰ কথা উল্লেখ কৰিছিল ৰাকেশ কুমাৰে ৷ সৰ্বভাৰতীয় অসামৰিক সেৱাৰ বিষয়া কেপি ৰামাইয়াৰ জামিন আবেদনৰ শুনানিৰ সময়তে কিদৰে বিষয়াগৰাকীয়ে নিম্ন আদালত তথা উচ্চতম ন্যায়ালয়ৰ পৰা জামিন লাভ কৰিবলৈ সক্ষম হ'ল তাক লৈ প্ৰশ্ন উত্থাপন কৰিছিল ৷ ভিজিলেন্স আদালতে নিয়মীয়া ন্যায়াধীশ উপস্থিত নথকাৰ সময়ত অস্থায়ী ন্যায়াধীশে ৰামাইয়াৰ দৰে দুৰ্নীতিগ্ৰস্থ বিষয়াক জামিন প্ৰদান কৰিছিল বুলি উল্লেখ কৰে ৷ উল্লেখ্য যে, বিহাৰ মহাদলিত বিকাশ মিছনৰ 5কোটি টকাৰ কেলেংকাৰী গোচৰত অভিযুক্ত হৈছিল সৰ্বভাৰতীয় অসামৰিক সেৱাৰ বিষয়া কেপি ৰামাইয়া ৷
ন্যায়াধীশগৰাকীয়ে অভিযোগ উত্থাপন কৰে যে, পাটনা উচ্চ ন্যায়ালয়ৰ পূৰ্ণ বিচাৰপীঠে নিম্ন আদালতৰ পৰা অহা সকলো গোচৰে উদাসীনভাৱে গ্ৰহণ কৰে ৷ মই অনুৰোধ কৰাৰ পিচতো এনেকুৱা গম্ভীৰ অভিযোগ থকা ন্যায়াধীশৰ বিৰুদ্ধে কঠোৰ শাস্তিৰ বিপৰীতে সাধাৰণ শাস্তি প্ৰদান কৰিয়ে এৰি দিয়া হৈছিল ৷ ইয়াৰ উপৰিও উচ্চ ন্যায়ালয়ৰ ন্যায়াধীশসকলে ৰাইজৰ টকাৰ অপচয় কৰি চৰকাৰী বাসভৱনত থকাৰ বিপৰীতে গেষ্ট হাউচত আশ্ৰয় গ্ৰহণ কৰি আছে ৷ সমগ্ৰ বিষয়টো সন্দৰ্ভত ৰাকেশ কুমাৰে এটা প্ৰতিলিপি দেশৰ মুখ্য ন্যায়াধীশ, প্ৰধানমন্ত্ৰীৰ কাৰ্যালয় আৰু কেন্দ্ৰীয় আইন মন্ত্ৰালয়লৈ প্ৰেৰণ কৰিবলৈ নিৰ্দেশনা জাৰি কৰিছিল ৷
