নিউজ ডেস্ক, ৫ জুলাইঃ ৰাজধানী দিল্লীত পূৰ্বৰ তুলনাত ১০.৫৮ শতাংশ হ্ৰাস পাইছে কোভিড-১৯ পজিটিভ লোকৰ সংখ্যা । ইয়াৰ বিপৰীতে বৃদ্ধি পাইছে এই মহামাৰীৰ পৰা আৰোগ্য লাভ কৰা ৰোগীৰ হাৰ । দিল্লী চৰকাৰে শেহতীয়াকৈ প্ৰকাশ কৰা তথ্য অনুসৰি সম্প্ৰতি চহৰখনত কৰ'ণা ভাইৰাছৰ পৰা আৰোগ্য লাভ কৰা লোকৰ হাৰ ৭০ শতাংশলৈ বৃদ্ধি পাইছে । লগতে, বৰ্তমান ৬৪ শতাংশ বিছনা কোভিড-ৰোগীৰ বাবে খালী আছে বুলি খালি আছে বুলি জানিব পৰা গৈছে।
"ৰোগীসকলৰ আত্মবিশ্বাস, কৰ'ণা ভাইৰাছ পৰীক্ষা ব্যৱস্থা বৃদ্ধি, হ'ম আইছলেশ্বন, হাস্পতালত আইছলেশ্বনৰ সুবিধা বৃদ্ধি, হাস্পতালসমূহৰ পৰিদৰ্শন আৰু হাস্পতালসমূহত কোভিড-১৯ ৰোগীৰ বাবে বিচনাৰ সুবিধা বৃদ্ধি" - এই ৰণনীতিৰ দ্বাৰাই দিল্লীত কোভিড-১৯ৰ বিৰুদ্ধে যুঁজ দি থকা হৈছে বুলি আম আদমী দলৰ নেতা সৌৰভ ভৰদ্বাজে প্ৰকাশ কৰে । নেতাগৰাকীয়ে প্ৰকাশ কৰা অনুসৰি ৰাজধানী চহৰখনত প্ৰতিদিনে প্ৰায় ২৩,০০০ হাজাৰ লোকৰ কোভিড-১৯ পৰীক্ষা কৰা হয় ।
বিগত ২৪ ঘণ্টাত দিল্লীত কৰ'ণা ভাইৰাছত আক্ৰান্ত হোৱা লোকৰ তুলনাত আৰোগ্য লাভ কৰা ৰোগীৰ সংখ্যা অধিক। এই যুঁজত অৱতীৰ্ণ হোৱাৰ ক্ষেত্ৰত দিল্লীবাসীৰ অৱদান উল্লেখনীয় বুলিও উল্লেখ কৰে নেতাগৰাকীয়ে । যদি লোকসকলে সামাজিক দূৰত্ব মানি চলাৰ ক্ষেত্ৰত অৱহেলা কৰে তেন্তে পুনৰ এই ভাইৰাছৰ সংক্ৰমণ বৃদ্ধি পাব বুলি প্ৰকাশ কৰে সৌৰভ ভৰদ্বাজে ।
বিগত সপ্তাহত দিল্লীত প্ৰতিদিনে প্ৰায় ২৩০০ গৰাকী লোকৰ দেহত কোভিড-১৯ৰ অৱস্থিতি লাভ কৰা গৈছিল যদিও, বহুসংখ্যক লোকে এই ভাইৰাছৰ কৱলৰ পৰা উপশম লাভ কৰা বুলি মুখ্যমন্ত্ৰী অৰবিন্দ কেজৰিৱালে শনিবাৰে উল্লেখ কৰিছিল । সম্প্ৰতি চহৰখনত মুঠ ৯,৯০০ খন বিচনা খালি আছে বুলি জানিব পৰা গৈছে।
