নেশ্যনেল ডেস্ক, 30 ডিচেম্বৰ : উত্তৰ প্ৰদেশৰ গ্ৰেটাৰ নয়দাত সোমবাৰে এখন বাহন দুৰ্ঘটনাত পতিত হোৱাত 6 জন লোকৰ মৃত্যু হয় ৷ ঘন কুঁৱলীৰ ফলত বাহনখন পথৰ পৰা পিছলি গৈ খাৱৈত বাগৰি পৰে বুলি আৰক্ষীয়ে প্ৰকাশ কৰিছে ৷
দেওবাৰে নিশা প্ৰায় 11.30 বজাত সংঘটিত ঘটনাত আন পাঁচজন যাত্ৰী আঘাতপ্ৰাপ্ত হৈছে ৷ আৰক্ষী বিভাগৰ এগৰাকী মুখপাত্ৰই জানিবলৈ দিয়া অনুসৰি, "মাৰুতি আৰ্টিগা বাহনখনত মুঠ 11 জন লোক আছিল ৷ বাহনখন দানকৌৰ অঞ্চলৰ খেৰলি খালত বাগৰি পৰে ৷ 11 জন লোকক ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে 6 জনৰ মৃত্যু হোৱা বুলি ঘোষণা কৰে আৰু পাঁচজন চিকিৎসাধীন অৱস্থাত আছে ৷"
কুঁৱলীৰ ফলত সমগ্ৰ ঘটনা সংঘটিত হোৱা বুলি চৰকাৰী বিবৃতিত প্ৰকাশ কৰা হৈছে ৷ মৃত লোককেইজন মহেশ (35),কৃষণ লাল (50),নৰেশ (17), ৰাম খিলাড়ী (75),মল্লু (12) আৰু নেত্ৰপাল (40) বুলি চিনাক্ত কৰা হৈছে ৷
আৰু পঢ়ক : নৱবৰ্ষৰ প্ৰাক মূহুৰ্তত মূলসুতিলৈ উগ্ৰপন্থীৰ বৃহৎ দল
