নিউজ ডেস্ক, ২৩ অক্টোবৰ : কানাডা-আমেৰিকাৰ কূটনৈতিক বিষয় এতিয়াও চৰ্চাৰ শীৰ্ষত আছে । তাৰ মাজতে আমেৰিকা আৰু ব্ৰিটেইনে ৪১ গৰাকী কানাডিয়ান কূটনীতিবিদক ভাৰতৰ পৰা বহিষ্কাৰ কৰা বিষয়ত কানাডাৰ সমৰ্থনত বিবৃতি প্ৰকাশ কৰিছে । অৱশ্যে ভাৰতৰ বৈদেশিক পৰিক্ৰমা মন্ত্ৰালয়ে ৱাশ্বিংটন আৰু লণ্ডনক প্ৰতিহত কৰিবলৈ এতিয়ালৈকে কোনো আনুষ্ঠানিক বিবৃতি জাৰি কৰা নাই ।
ইয়াৰ পৰিৱৰ্তে বৈদেশিক পৰিক্ৰমা মন্ত্ৰী এছ জয়শংকৰে বিষয়টোত ভাৰতৰ স্থিতি স্পষ্ট কৰিবলৈ আৰু লগতে ভাৰতৰ বিষয়ে কিবা কোৱাৰ পূৰ্বে তাৰ প্ৰতি সাৱধান হ'বলৈ কানাডালৈ এক সূক্ষ্ম বাৰ্তা প্ৰেৰণ কৰাৰ বাবে এক ৰাজহুৱা মঞ্চ বাছনি কৰে । তেওঁ নতুন দিল্লীৰ ইখন দেশে সিখন দেশত নিযুক্ত কূটনীতিবিদৰ সংখ্যাত সমতা অনাৰ সিদ্ধান্তকো ন্যায়সঙ্গত কৰে ।
উল্লেখ্য যে প্ৰায় এমাহ পূৰ্বে খলিস্তানী বিচ্ছিন্নতাবাদী হৰদীপ সিং নিজ্জাৰ নামৰ এজন কানাডিয়ান নাগৰিকক হত্যা কৰাৰ ক্ষেত্ৰত ভাৰতৰ হাত আছে বুলি সংসদৰ মজিয়াত কানাডাৰ প্ৰধানমন্ত্ৰী জাষ্টিন ট্ৰুডোৰ বিস্ফোৰক অভিযোগৰ পিছতে ভাৰত আৰু কানাডা এমাহ ধৰি এক বৃহৎ কূটনৈতিক বিতৰ্কত জড়িত হৈ আছে ।
আনহাতে, ট্ৰুডোৰ অভিযোগৰ লগতে কানাডাৰ বৈদেশিক মন্ত্ৰী জলিয়ে কানাডাত নিযুক্ত এজন জ্যেষ্ঠ ভাৰতীয় কূটনীতিবিদক বহিষ্কাৰ কৰাৰ কথা ঘোষণা কৰে । লগতে কূটনৈতিক প্ৰটোকল উলংঘা কৰি কূটনীতিবিদজনৰ নামো প্ৰকাশ কৰে । ইফালে যেনে কুকুৰ তেনে টাঙোনৰ পদক্ষেপ গ্ৰহণ কৰি বৈদেশিক পৰিক্ৰমা মন্ত্ৰালয়ে ভাৰতলৈ কানাডাৰ উচ্চায়ুক্ত কেমেৰুন মেকেক মাতি পঠিয়ায় । লগতে নতুন দিল্লীত নিযুক্ত এগৰাকী জ্যেষ্ঠ কানাডিয়ান কূটনীতিবিদক বহিষ্কাৰ কৰাৰ নিৰ্দেশ দিয়ে । ইয়াৰ উপৰি নতুন দিল্লীয়ে ট্ৰুডোৰ অভিযোগক অযুক্তিকৰ আৰু অনুপ্ৰেৰিত বুলি খাৰিজ কৰে ।
বৈদেশিক পৰিক্ৰমা মন্ত্ৰালয়ে কয়, "এনে ধৰণৰ ভিত্তিহীন অভিযোগবোৰে খালিস্তানী সন্ত্ৰাসবাদী আৰু উগ্ৰপন্থীসকলৰ পৰা মনোযোগ আঁতৰাব বিচাৰে, যাক কানাডাত আশ্ৰয় দিয়া হৈছে । সেইবোৰে ভাৰতৰ সাৰ্বভৌমত্ব আৰু আঞ্চলিক অখণ্ডতাৰ প্ৰতি ভাবুকি অব্যাহত ৰাখিছে ।" ট্ৰুডোৱে তেওঁৰ অভিযোগ উত্থাপন কৰাৰ পিছৰে পৰা ভাৰতে কানাডাত ভাৰতীয় অভিযানত ইয়াৰ কূটনীতিবিদসকলৰ সুৰক্ষাৰ কথা উল্লেখ কৰি সকলো কানাডিয়ান নাগৰিকৰ বাবে ভিছা সেৱা স্থগিত ৰাখিছে । ইয়াৰ উপৰি ভাৰতৰ পৰা আৰু ৪১ জন কানাডিয়ান কূটনীতিবিদক বহিষ্কাৰ কৰাৰ নিৰ্দেশ দি কয় যে দুয়োখন দেশৰ কূটনীতিবিদৰ সংখ্যাত সমতা থাকিব লাগে ।
উল্লেখ্য যে ৪১ জন কূটনীতিবিদক কূটনৈতিক সুৰক্ষা প্ৰত্যাহাৰ কৰাৰ পিছত জলিয়ে এইদৰে কৈছিল; "৪১ জন কূটনীতিবিদৰ কূটনৈতিক সুৰক্ষা প্ৰত্যাহাৰ কৰাটো কেৱল অভূতপূৰ্বয়ে নহয়, আন্তৰ্জাতিক আইনৰো বিপৰীত ।" চলিত মাহৰ আৰম্ভণিতে কানাডাই ৪১ জন কূটনীতিবিদ আৰু তেওঁলোকৰ পৰিয়ালৰ ৪২ জন সদস্যক ভাৰতৰ পৰা প্ৰত্যাহাৰ কৰাৰ পিছত তেওঁ এনেদৰে কয় ।
লগতে পঢ়ক :Arvind Kejriwal on BJP : বিজেপিক উৎখাত কৰাটো দেশপ্ৰেমৰ আটাইতকৈ ডাঙৰ কাৰ্য
