নিউজ ডেস্ক, 6 অক্টোবৰ : উত্তৰ প্ৰদেশৰ লখিমপুৰ খেৰীত সংঘটিত হিংসাত্মক ঘটনাই দেশৰ ৰাজনীতি উত্তপ্ত কৰি তুলিছে ৷ এই ঘটনাৰ তীব্ৰ প্ৰতিবাদ জনাইছে বিৰোধীৰ পক্ষৰ ৰাজনৈতিক দল সমূহে ৷ ইয়াৰ মাজতে তৃণমূল সাংসদ সুস্মিতা দেবৰ নেতৃত্বত লখিমপুৰৰ খেৰীত উপস্থিত হয় তৃণমূল কংগ্ৰেছৰ এটা সজাতি দল ৷
TMC ৰ দলটোৱে খেৰীৰ ঘটনাত নিহত কৃষকৰ পৰিয়ালৰ লোকসকলক প্ৰথমে সাক্ষাৎ কৰি সমবেদনা জ্ঞাপন কৰে ৷ ইয়াৰ লগতে প্ৰতিটো পৰিয়ালৰ সদস্য সকলৰ সৈতে মত বিনিময় কৰি ঘটনাৰ বুজ লয় ৷ তদুপৰি লখিমপুৰ কেইবাগৰাকী কৃষক নেতাক লগ ধৰে সুস্মিতা দেবৰ নেতৃত্বত যোৱা TMC ৰ দলটোৱে ৷
নিহত কৃষকৰ পৰিয়ালক সাক্ষাৎ কৰাৰ পাচতে সুস্মিতা দেবে এক টুইটযোগে কয়, কৃষক বিৰোধী ক'লা আইন বাতিল আৰু খেৰীৰ দৰে নিৰ্মম অন্যায় বন্ধ কৰাৰ বাবে কৃষকৰ কাষত থিয় দিছে তৃণমূল কংগ্ৰেছ ৷ TMC ৰ নেত্ৰী মমতা বেনাৰ্জীয়ে সদায় কৃষকৰ স্বাৰ্থত যুঁজ দি আহিছে আৰু ভাৰতীয় কৃষকৰ স্বাৰ্থত যুঁজ অব্যাহত ৰাখিব বুলি কয় সুস্মিতা দেবে ৷
উল্লেখ্য যে, লখিমপুৰ খেৰীত কৃষক বিৰোধী কৃষি আইন বাতিলৰ দাবীত একত্ৰিত হোৱা একাংশ কৃষকক মহতিয়াই নিছিল এখন তীব্ৰ বেগী বাহনে ৷ উত্তৰ প্ৰদেশৰ উপ মুখ্যমন্ত্ৰী কেশৱ প্ৰসাদ যাদৱে খেৰী ভ্ৰমণৰ বাবে যোৱাৰ সময়তে সংঘটিত হৈছিল এই হিংসাত্মক ঘটনা ৷
উক্ত ঘটনাত 8 গৰাকীকৈ প্ৰতিবাদী কৃষকে প্ৰাণ হেৰুৱাবলগীয়া হৈছিল ৷ ইয়াৰ পাচতে কেন্দ্ৰীয় মন্ত্ৰী অজয় মিশ্ৰ টেনীৰ পুত্ৰ আশিস মিশ্ৰৰ বিৰুদ্ধে এই ঘটনা সংঘটিত কৰাৰ অভিযোগ উত্থাপন কৰে কৃষক সংগঠনে ৷
লগতে পঢ়ক:উত্তৰ প্ৰদেশৰ হিংসাত্মক ঘটনাক লৈ দেশজুৰি প্ৰতিবাদ কংগ্ৰেছৰ
