আগৰতলা, 17 নৱেম্বৰ : বহিঃৰাজ্যৰ পৰা অহা একাংশ লোকেহে ত্ৰিপুৰাৰ শান্তিপূৰ্ণ পৰিৱেশ বিনষ্ট কৰিছে ৷ এই অভিযোগ ৰাজ্যখনৰ তথ্য আৰু সাংস্কৃতিক মন্ত্ৰী সুশান্ত চৌধুৰীৰ (ICA Minister Sushanta Chowdhury) ৷ সাংবাদিকৰে মত বিনিময় কৰি মন্ত্ৰীগৰাকীয়ে কয়, "ত্ৰিপুৰাত জাতি-ধৰ্ম-বৰ্ণ নিৰ্বিশেষ সকলো লোকেই ভাতৃত্ববোধেৰে বসবাস কৰি আহিছে ৷ কিন্তু যোৱা কিছুদিন ধৰি বহিৰাগত একাংশ লোকে ৰাজ্যখনৰ এই পৰিৱেশটো বিনষ্ট কৰিবলৈ প্ৰয়াস কৰি আহিছে ৷ এয়া নিন্দনীয় ৷"
তেওঁ লগতে কয়, ত্ৰিপুৰাৰ বাহিৰৰ পৰা অহা কিছুসংখ্যক লোকে মিছা ভাওনাত ৰাজ্যখনত প্ৰৱেশ কৰি ৰাজ্যখনৰ সাংস্কৃতিক ঐতিহ্য আৰু গৌৰৱ কলুষিত কৰিবলৈ চেষ্টা কৰি আছে ৷ ভুৱা বাতৰি আৰু ভিডিঅ’ প্ৰচাৰ কৰি, কিছুসংখ্যক লোকে ৰাজ্যখনৰ হিন্দু-মুছলমানৰ মাজত থকা একতাৰ পৰিৱেশ বিনষ্ট কৰি বিভেদ আনিবলৈ প্ৰয়াস কৰি আছে ৷
বৰ্তমানলৈকে ৰাজ্যখনত এনে কোনো বিক্ষিপ্ত ঘটনা সংঘটিত হোৱা নাই যিয়ে এই শান্তিপূৰ্ণ বাতাবৰণ বিনষ্ট কৰিব পাৰে ৷ ৰাজ্যখনৰ হিন্দু-মুছলমান, জাতি-জনজাতিৰ লোকসকল ভাতৃত্ববোধৰ দ্বাৰা আৱদ্ধ । ইয়াক ধ্বংস কৰিবলৈ এটা গভীৰ ষড়যন্ত্ৰ চলি আছে । ৰাজ্য চৰকাৰে এই ষড়যন্ত্ৰ মষিমূৰ কৰিবলৈ জনসাধাৰণৰ সৈতে মিলি মোকাবিলা কৰিব ৷
কিছুদিন পূৰ্বে একাংশই ত্ৰিপুৰাত জনগোষ্ঠীয় বিভিন্নতা অনাৰ প্ৰয়াস কৰিছিল ৷ কিন্তু মুখ্যমন্ত্ৰী বিপ্লৱ কুমাৰ দেৱৰ তৎপৰাত আৰু ত্ৰিপুৰা আৰক্ষীৰ সহযোগিতাত, ইয়াৰ সৈতে কঠোৰভাৱে মোকাবিলা কৰা হয় ৷ ৰাজ্য চৰকাৰে কোনো ষড়যন্ত্ৰৰ জৰিয়তে ৰাজ্যখনক বদনাম হ'বলৈ নিদিয়ে বুলিও মন্তব্য কৰে মন্ত্ৰী সুশান্ত চৌধুৰীয়ে ৷
লগতে পঢ়ক : Assam Rifles ৰ অভিযানত তিনিজন NSCN কেডাৰ নিহত
