নিউজ ডেস্ক, 30 মাৰ্চ: মধ্যপ্ৰদেশৰ খাণ্ডৱা-ইন্দোৰ ৰাষ্ট্ৰীয় ঘাইপথত সংঘটিত হৈছে এক শিহৰণকাৰী দুৰ্ঘটনা ৷ এখন ট্ৰাক আৰু এখন যাত্ৰী বাছৰ সংঘৰ্ষত শিৰচ্ছেদ হৈ থিতাতে নিহত হয় এগৰাকী 11 বছৰীয়া ছাত্ৰী ৷ এই ঘটনাই বুকু কঁপাই গৈছে সমগ্ৰ দেশবাসীৰ ৷
ঘটনাৰ বিৱৰণী অনুসৰি, বৰৱাহৰ মঙলবাৰে পুৱা এখন বিয়াত অংশগ্ৰহণ কৰাৰ উদ্দেশ্যেৰে পিতৃ-মাতৃৰ সৈতে বাছত যাত্ৰা কৰি আছিল 11 বছৰীয়া তামান্না নামৰ কণমানি গৰাকীয়ে ৷ বাছখন দেশগাঁও আৰক্ষী চকীৰ অন্তৰ্গত ৰতিয়া গাঁৱত উপস্থিত হোৱাৰ সময়তে বমিৰ অনুভৱ কৰে কণমানি তামান্নাই ৷ যাৰ বাবে খিৰিকিৰে মূৰ উলিয়াই বমি কৰাৰ যত্ন কৰিছিল তামান্নাই ৷
ঠিক সেই সময়তে কালৰূপ ধাৰণ কৰি বিপৰীত দিশৰ পৰা অহা এখন দ্ৰুতবেগী ট্ৰাকে নিয়ন্ত্ৰণ হেৰুৱাই তামান্নাই যাত্ৰা কৰি থকা বাছ খনত খুণ্ডা মাৰি যায় ৷ এই ঘটনাত নিমিষতে শৰীৰৰ পৰা মূৰটো বিছিন্ন হৈ পৰে কণমানি গৰাকীৰ ৷ উক্ত ঘটনাটো ইমানেই ভয়ংকৰ আছিল যে ঘটনাৰ প্ৰতক্ষ্যদৰ্শীসকলে বহু সময়লৈ একো ক’ব নোৱাৰা এক পৰিস্থিতিৰ সৃষ্টি হৈছিল ৷ ঘটনাৰ খবৰ পোৱাৰ লগে লগে ঘটনাস্থলীত উপস্থিত হৈ ট্ৰাকখনৰ চালকক আটক কৰাৰ লগতে ট্ৰাকখন জব্দ কৰে স্থানীয় আৰক্ষীয়ে ৷
উল্লেখ্য যে, মাতৃ আৰু ভগ্মীৰ সতে বিয়ালৈ বুলি গৈ আছিল দুৰ্ভগীয়া কণমাণি গৰাকী ৷ খাণ্ডৱাৰ পৰা প্ৰায় 20 কিলমিটাৰ নিলগত সংঘটিত হয় এই ঘটনা ৷ মৰণোত্তৰ পৰীক্ষা সম্পন্ন হোৱাৰ পাছত ইতিমধ্যে পৰিয়ালক গতাই দিয়া হৈছে কণমানি গৰাকীৰ মৃতদেহ ৷
