জিৰিবামত সহকৰ্মীৰ গুলীত নিহত মণিপুৰ আৰক্ষীৰ উপ-পৰিদৰ্শক

শিলচৰ: মণিপুৰৰ জিৰিবামত ভয়ংকৰ ঘটনা । সহকৰ্মীৰ গুলীত নিহত মণিপুৰ আৰক্ষীৰ এগৰাকী উপ-পৰিদৰ্শক ৷ শনিবাৰে দুপৰীয়া জিৰিবামৰ মংবুঙত সংঘটিত হয় এই ঘটনা ৷ মৃত উপ-পৰিদৰ্শকজনৰ নাম মহম্মদ চাহাজান বুলি জানিব পৰা গৈছে । সহকৰ্মী এগৰাকী আৰক্ষীৰ লগত কিবা এটা বিষয় লৈ কাজিয়াৰ সূত্ৰপাত ঘটে চাহাজানৰ । এটা সময়ত দুয়োৰে এই কাজিয়াই ভয়ংকৰ ৰূপ ধাৰণ কৰে । ইয়াৰ মাজতে সহকৰ্মী আৰক্ষীজনে নিজৰ ছাৰ্ভিচ ৰাইফলেৰে গুলীয়াই হত্যা কৰে চাহাজানক । ফলত ঘটনাস্থলীত গুলীবিদ্ধ হৈ মৃত্যু হয় মহম্মদ চাহাজানৰ । ঘটনাৰ পাছত হত্যাকাৰী আৰক্ষী কৰ্মীজনক আটক কৰা হয় ।