নেশ্যনেল ডেস্ক, ১৭ মে’ : ১৯ মে’ত ব্লু অৰিজিন (Blue Origin)ৰ পৰৱৰ্তী বিমানত মহাকাশলৈ যাত্ৰা কৰিবলৈ সাজু হৈছে ভাৰতীয় পাইলট গোপীচন্দ থোটাকুৰা (Gopichand Thotakura) । এই উৰণ পাচত ব্লু অৰিজিনেৰে যাত্ৰা কৰা তেওঁ প্ৰথম ভাৰতীয় পৰ্যটক হ’ব বুলি বৃহস্পতিবাৰে ঘোষণা কৰিছে কোম্পানীটোৱে ।
১৯৮৪ চনত ৰাকেশ শৰ্মাৰ ৰাছিয়াৰ সয়ুজ টি-১১ বিমানত যাত্ৰা কৰাৰ পাচত মহাকাশ ভ্ৰমণ কৰা দ্বিতীয়জন ভাৰতীয় হিচাপে পৰিগণিত হ’ব গোপীচন্দ থোটাকুৰা । ৰাকেশ শৰ্মাৰ পাচত মহাকাশলৈ গৈছে কেৱল ভাৰতীয় মূলৰ লোকহে । কল্পনা চাওলা (১৯৯৭), সুনীতা উইলিয়ামছ (২০০৬) আৰু ৰাজা চাৰি (২০২১)ৰ নামো এই তালিকাত অন্তৰ্ভুক্ত কৰা হৈছে ।
এই সন্দৰ্ভত কেপ্তেইন গোপীচন্দে কয়, ‘‘ব্লু অৰিজিনৰ এন এছ-২৫ অভিযানৰ সৈতে এই ঐতিহাসিক যাত্ৰাৰ সৈতে জড়িত হৈ মহাকাশ ভ্ৰমণত ভাৰতক প্ৰতিনিধিত্ব কৰাটো গৌৰৱ আৰু সন্মানৰ বিষয় । সমগ্ৰ বিশ্বতে মহাকাশ অন্বেষণৰ ক্ষেত্ৰত ভাৰতে নিজৰ স্থান দখল কৰিছে । এই যাত্ৰা বিশ্ব পৰ্যায়ত মানৱ প্ৰচেষ্টা আৰু কৌশলৰ মনোভাৱৰ প্ৰতীক । আশাকৰো এই অন্বেষণে STEAM পেছাদাৰী প্ৰজন্মক অনুপ্ৰাণিত কৰিব । আমি একেলগে মহাকাশ অন্বেষণৰ সীমালৈ আগবাঢ়িছো ।’’
কেৱল কেপ্তেইন গোপীচান্দই নহয়, তেওঁৰ সৈতে ব্লু অৰিজিনৰ এন এছ-২৫ অভিযানত ক্ৰু সদস্য মেছন এংগেল, চিলভেন চিৰৌন, কেনেথ এল স্মিথো থাকিব । হেইছ কেৰল শ্বালাৰৰ সৈতে বায়ুসেনাৰ প্ৰাক্তন কেপ্তেইন এড ড্ৱাইটো থাকিব ।
কোম্পানীটোৱে জনোৱা মতে, পশ্চিম টেক্সাছৰ লঞ্চ চাইট ৱানৰ পৰা এই অভিযান আৰম্ভ কৰা হ’ব । বিমানখনৰ বাবে লঞ্চ উইণ্ড’ আৰম্ভ হ’ব ০৮৩০ চিটি (৭ বজাত আই এছ টি)ৰ পৰা । জেফ বেজোছৰ মালিকানাধীন কোম্পানীটোৱে এতিয়ালৈকে ৬ খন মানৱ বিমান চলাইছে । ই ৩১ জন লোকক পৃথিৱীৰ বায়ুমণ্ডল আৰু মহাকাশৰ মাজৰ সীমা কৰ্মন লাইনলৈ প্ৰেৰণো কৰিছে, যি মাটিৰ পৰা বহু কিলোমিটাৰ উচ্চতাত আছে ৷
লগতে পঢ়ক :
পৃথিৱীৰ চুবুৰীয়া গ্ৰহ শুক্ৰত কিয় পানী নাই ? - Why Venus dry
মাধ্যাকৰ্ষণেৰে ভৰা কৃষ্ণগহ্বৰ; ৰহস্যৰ মাজত আজিও ওপঙি আছে মহাকাশত - BLACK HOLE PHOTOS
ISRO ৰ আন এক কৃতিত্ব; সফলতাৰে সম্পন্ন PS4 ইঞ্জিনৰ কাম - PS4 engine
