হায়দৰাবাদ: ভাৰতীয় প্ৰযুক্তি প্ৰতিষ্ঠান মাদ্ৰাজে (আই আই টি মাদ্ৰাজ) স্মাৰ্টফোন, টেবলেট, ঘড়ী আৰু পৰিধানযোগ্য সামগ্ৰীৰ বাবে পৰৱৰ্তী প্ৰজন্মৰ AMOLED ডিছপ্লে বিকশিত কৰাৰ বাবে উৎসৰ্গিত এক নতুন গৱেষণা কেন্দ্ৰ উন্মোচন কৰিছে । ‘AMOLED গৱেষণা কেন্দ্ৰ’ (ARC) নামেৰে নামাকৰণ কৰা এই ৰাষ্ট্ৰীয় উৎকৃষ্টতা কেন্দ্ৰটো ইলেক্ট্ৰনিকছ আৰু তথ্য প্ৰযুক্তি মন্ত্ৰণালয় (MeitY), ভাৰত চৰকাৰ, প্ৰতিৰক্ষা গৱেষণা আৰু উন্নয়ন সংস্থা (DRDO) আৰু টাটা ছন্সৰ পুঁজিৰে চলি আছে । এই কেন্দ্ৰৰ লক্ষ্য হৈছে ভাৰতৰ ডিছপ্লে মেনুফেকচাৰিং উদ্যোগক শক্তিশালী কৰা ।
আই আই টি মাদ্ৰাজৰ বৈদ্যুতিক অভিযান্ত্ৰিক বিভাগত অৱস্থিত এই এ আৰ চিত ‘ক্লাছ 100’ আৰু ‘ক্লাছ 1000’ ৰেটিং থকা অত্যাধুনিক ক্লীনৰুম আছে । ইয়াৰ উপৰিও ইয়াত উন্নত নিৰ্মাণ আৰু বৈশিষ্ট্য নিৰ্ণয়ৰ সঁজুলিও আছে । প্ৰধান নিৰ্মাণ ব্যৱস্থাটো হৈছে এটা অ’এলইডি ক্লাষ্টাৰ য’ত বৃদ্ধিৰ পৰিমাপসমূহৰ নিখুঁত নিয়ন্ত্ৰণৰ সৈতে বহুস্তৰীয় অ’এলইডিসমূহ বৃদ্ধি কৰিব পাৰি ।
আই আই টি মাদ্ৰাজে সৃষ্টি কৰা উন্নত পিক্সেল পেটাৰ্নিং ব্যৱস্থাও থকা এই কেন্দ্ৰটোৱে দ্ৰুত বৃদ্ধি আৰু পেটাৰ্নিং পদ্ধতিৰ জৰিয়তে পৰৱৰ্তী প্ৰজন্মৰ এমোলেড ডিছপ্লেৰ ওপৰত গুৰুত্ব আৰোপ কৰে । ইয়াৰ উপৰিও ই যন্ত্ৰসমূহৰ বৈশিষ্ট্য নিৰ্ণয় কৰে, ইয়াৰ অপ্টোইলেক্ট্ৰনিক গুণসমূহ অধ্যয়ন কৰে । ইয়াৰ উপৰিও কেন্দ্ৰটোৱে পোহৰ আৰু টিভিৰ বাবে বগা অ’এলইডি আৰু জৈৱিক ফটোভল্টিক যন্ত্ৰৰ ওপৰত কাম কৰে ।
আই আই টি মাদ্ৰাজত AMOLED গৱেষণা কেন্দ্ৰ (ARC) উদ্বোধন
2024 চনৰ 21 ডিচেম্বৰত আই আই টি মাদ্ৰাজ চৌহদত MeitY ৰ সম্পাদক শ্ৰী এছ কৃষ্ণনৰ সভাপতিত্বত অনুষ্ঠিত হয় এ আৰ চিৰ উদ্বোধনী অনুষ্ঠান । উন্মোচনী অনুষ্ঠানৰ সময়ত কৃষ্ণনে আই আই টি মাদ্ৰাজত এমোলেড গৱেষণা কেন্দ্ৰ উদ্বোধন কৰি আনন্দ প্ৰকাশ কৰে । তেওঁ স্মাৰ্টফোন, স্মাৰ্টৱাচ, টেবলেট আদি ডিজিটেল ডিভাইচৰ বাবে এমোলেড ডিছপ্লে নিৰ্মাণৰ নতুন কৌশল বিকশিত কৰাৰ লক্ষ্যৰে ভাৰত চৰকাৰৰ পুঁজিৰে ৰাষ্ট্ৰীয় উৎকৃষ্টতা কেন্দ্ৰ হিচাপে কেন্দ্ৰটোৰ ভূমিকাক আলোকপাত কৰে ।
কেন্দ্ৰটোৱে মোবাইল ফোনসমূহৰ বাবে অ’এলইডি লাইটিং আৰু অ’পিভি পাৱাৰ ছ’ৰ্চৰ বাবে প্ৰ’ট’টাইপ তৈয়াৰ কৰাত গুৰুত্ব আৰোপ কৰে কৃষ্ণনে ।
MeitY ৰ সম্পাদকৰ সৈতে যোগদান কৰে আই আই টি মাদ্ৰাজৰ সঞ্চালক অধ্যাপক ভি কামাকোটি আৰু গৱেষণা দলৰ মূল ব্যক্তি-- ড° দেৱদত্ত সত্যজিৎ, প্ৰধান তদন্তকাৰী (প্ৰধান গৱেষক), ড° জি ৰাজেশ্বৰন (সহ-গৱেষক), ড° সৌম্য দত্ত (সহ-গৱেষক) আৰু ডাঃ জি ভেংকটেশ (সহ-গৱেষক)। ইয়াৰ উপৰিও আই আই টি মাদ্ৰাজৰ অধ্যাপক, গৱেষক আৰু ছাত্ৰ-ছাত্ৰীৰ সৈতে এই অনুষ্ঠানত গ্ৰুপ সমন্বয়ক শ্ৰীমতী আশা নংগিয়া, MeitY ৰ বিজ্ঞানী শ্ৰী ৰবিন্দৰ কুমাৰ মীনা আৰু গ্ৰাণ্টউড লিমিটেডৰ ড° অমিতাভ মজুমদাৰে অংশগ্ৰহণ কৰে ।
আই আই টি মাদ্ৰাজৰ সঞ্চালক অধ্যাপক ভি কামাকোটিয়ে ভাৰতৰ অৰ্ধপৰিবাহী উদ্যোগক সহায় কৰি পৰৱৰ্তী প্ৰজন্মৰ এমোলেড ডিছপ্লে বিকশিত কৰাৰ ক্ষেত্ৰত এ আৰ চিৰ তাৎপৰ্যৰ ওপৰত আলোকপাত কৰে । তেওঁ কয় যে প্ৰায় 15 বিলিয়ন ডলাৰৰ বিশ্বব্যাপী এমোলেড ডিছপ্লে বজাৰখন বৃদ্ধি পোৱাৰ আশা কৰা হৈছে আৰু এ আৰ চিৰ গৱেষকসকলে উৎপাদন খৰচ হ্ৰাস কৰা আৰু মডিউলাৰ মাইক্ৰ’-ফেক্টৰী সক্ষম কৰাৰ লক্ষ্যৰে এমোলেড ডিছপ্লে সৃষ্টিৰ বাবে এক নতুন পেটাৰ্নিং কৌশলৰ ওপৰত কাম কৰি আছে ।
আই আই টি মাদ্ৰাজৰ এ আৰ চিৰ প্ৰধান তদন্তকাৰী ড০ দেৱদত্ত সত্যজিতে কয় যে তেওঁলোকে সৰু মাদাৰ-গ্লাছৰ আকাৰৰ সৈতে ইউনিট নিৰ্মাণৰ সময় বজাই ৰাখিবলৈ বা উন্নত কৰিবলৈ ‘গতি-অৰ্থনীতি’ৰ ওপৰত ভিত্তি কৰি অভিযান্ত্ৰিক কৌশলৰ অগ্ৰণী ৰূপ দিছে, যাৰ ফলত মডিউলাৰ উৎপাদন ব্যৱস্থাৰ সৃষ্টি হৈছে ।
