মৰাণ, ১৮ জুন : ৰাজ্যৰ বিভিন্ন স্থানত গঢ় লৈ উঠা নিচামুক্তি কেন্দ্ৰত পৰ্যাপ্ত সুবিধা আৰু উন্নত চিকিৎসাৰ ব্যৱস্থা নথকাত প্ৰায়ে ভয়ংকৰ ঘটনা সংঘটিত হৈ আহিছে । কিছু সংখ্যকে নিজৰ ব্যৱসায়িক লাভালাভৰ বাবে নিচামুক্তি কেন্দ্ৰ স্থাপন কৰি ধন লুণ্ঠনৰ বাবে চেষ্টা চলাই আহিছে বুলিও অভিযোগ উঠিছে ।
ইয়াৰ মাজতেই চৰাইদেউ জিলাৰ সোণাৰিৰ নিচামুক্তি কেন্দ্ৰত মঙলবাৰে চিকিৎসাধীন যুৱকৰ মৃত্যু হোৱাক লৈ চাঞ্চল্যৰ সৃষ্টি হৈছে । মৃত যুৱকজন সোণাৰিৰ ১৩ নং ৱাৰ্ডৰ দেৱজিৎ নন্দী । যুৱকজনৰ মৃত্যুৰ পাছতে সোণাৰিৰ বৰাহী চাৰিআলিস্থিত ৰিনিউৱেল ফাউণ্ডেশ্যন নিচামুক্তি কেন্দ্ৰৰ বিৰুদ্ধে গুৰুতৰ অভিযোগ উত্থাপন কৰিছে যুৱকজনৰ পৰিয়ালৰ লোকে ।
ভুক্তভোগী পৰিয়ালটোৱে নিচামুক্তি কেন্দ্ৰটোত নিয়মীয়া স্বাস্থ্য পৰীক্ষা নকৰাৰ অভিযোগ কৰিছে । যুৱকজনৰ পৰিয়ালে অভিযোগ কৰা অনুসৰি যোৱা ২৩ ডিচেম্বৰৰ পৰা এই নিচামুক্তি কেন্দ্ৰটোত চিকিৎসাধীন হৈ থকাৰ পাচত স্বাস্থ্যৰ অধিক অৱনতি ঘটাত চৰাইদেউ জিলা চিকিৎসালয়ত আজি পুৱা ভৰ্তি কৰোৱা হৈছিল যুৱকজনক । কিন্তু চিকিৎসালয়তে যুৱকজনৰ মৃত্যু হয় ।
আনহাতে,পৰিয়ালৰ অভিযোগ অনুসৰি প্ৰতিমাহে মাছুল আদায় কৰাৰ পাচতো এই কেন্দ্ৰটোত থকা নিচাসক্ত লোকসকলক প্ৰদান কৰা নহয় পৰ্যাপ্ত সুবিধা । দেওবাৰে নিশা যুৱকজনৰ স্বাস্থ্যৰ অৱস্থা ভাল নহয় বুলি জনাইছিল যদিও বিশেষ অসুবিধা নাই বুলি কেন্দ্ৰটোৰ কৰ্তৃপক্ষই পৰিয়ালক জনোৱাৰ পাছত আজি হঠাৎ যুৱকজনৰ মৃত্যু হোৱা ঘটনাই চাঞ্চল্যৰ সৃষ্টি কৰিছে ।
ইয়াৰ পৰিপ্ৰেক্ষিতত যুৱকজনৰ মৃতদেহ এতিয়ালৈকে চমজি লোৱা নাই পৰিয়ালৰ লোকে । অভিযোগ অনুসৰি ইযাৰ পূৰ্বেও এই কেন্দ্ৰটোত আন এজন লোকৰ মৃত্যু হৈছিল ।
