ডিফু, 9 আগষ্ট : অসম লেখিকা সমাজে দিনজোৰা কাৰ্যসূচীৰে শুকুৰবাৰে ডিফু ক্লাবত মাটি-মানুহ-সমন্বয় দিৱস হিচাপে 'আন্তঃৰাষ্ট্ৰীয় খিলঞ্জীয়া দিৱস' উদযাপন কৰে ৷ পুৱা বন্তি প্ৰজ্বলন আৰু গছপুলি ৰোপণেৰে আৰম্ভ হয় দিনটোৰ কাৰ্যসূচী ৷ ইয়াৰ পিছতে জয়শ্ৰী শইকীয়াই উদ্বোধন কৰা কবি সন্মিলন সম্পন্ন হয় ৷ দুপৰীয়া লেখিকা সমাজৰ সভাপতি পদুমী গগৈৰ সভাপতিত্বত অনুষ্ঠিত হয় মুকলি সভা ৷ সভাপতি গগৈয়ে অসম লেখিকা সমাজে কিদৰে মহিলা সকলৰ বাবে কাম কৰি আহিছে, লেখিকা সমাজে কৰি অহা কামৰ চমু খতিয়ান মুকলি সভাত দাঙি ধৰে ৷
এই মুকলি সভাতে অসম সাহিত্য সভাৰ প্ৰাক্তন সভাপতি তথা বিশিষ্ট সাহিত্যিক ৰংবং তেৰাঙক মুক্তি যুঁজাৰু দেউৰাম দত্ত সোঁৱৰণি মহীয়ান বঁটা প্ৰদান কৰে লেখিকা সমাজে ৷ বঁটা গ্ৰহণ কৰি বৰেণ্য সাহিত্যিক ৰংবং তেৰাঙে আজিৰ দিনটোত এগৰাকী মুক্তি যুঁজাৰুৰ নামত প্ৰদান কৰা বঁটা গ্ৰহণ কৰি তেখেতে গৌৰৱ অনুভৱ কৰা বুলি কয় ৷ এই সভাতে বিশিষ্ট সাহিত্যিকগৰাকীয়ে লেখিকা জয়শ্ৰী শইকীয়াৰ “নক্ষত্ৰ” নামৰ গ্ৰন্থখন উন্মোচন কৰে ৷ লগতে কাৰ্বি আংলং জিলা লেখিকা সমাজৰ “প্ৰয়াস” নামৰ স্মৰণিকাখন উন্মোচন কৰে কাৰ্বি সংস্কৃতিৰ সাধক লুনচে তিমুঙে ৷
মুকলি সভাত মুখ্য অতিথি হিচাবে উপস্থিত থাকে সমাজসেৱী কুন্তিলা ৰংহাংপী ৷ এই সভাত শিল্পী বিয়জা পায়েঙক লোকবন্ধু লম্বোধৰ কামান সোঁৱৰণী “মাটি-মানুহ-সমন্বয়” বঁটা প্ৰদান কৰা হয় ৷ ইফালে নিৰ্দিষ্ট বক্তাৰ ভাষণত লেখক-সাংবাদিক জয়ছিং হাঞ্চে বঁটা প্ৰাপক পবিত্ৰ বৰাই আন্তঃৰাষ্ট্ৰীয় খিলঞ্জীয়া দিৱসৰ তাৎপৰ্যৰ লগতে আজিৰ পৰিস্থিতিত খিলঞ্জীয়াৰ অস্তিত্বক লৈ বিভিন্ন উদাহৰণেৰে এক বিদ্যায়তনিক ভাষণ প্ৰদান কৰে ৷ এই সভাতে পদ্মশ্ৰী ধনেশ্বৰ ইংতি, বোলছবি প্ৰযোজক ধনীৰাম তিচ’, শিল্পী পখিলা লেকথিপী, জ্যেষ্ঠ সাংবাদিক মুকুল চন্দ্ৰ বৰুৱা, অম্বিকা থাপা, শিল্পী জয়মতী নাৰ্জাৰী, লোকশিল্পী কিৎমত হাঞ্চু, লেখক-সাংবাদিক নগেন বৰা আৰু বিশিষ্ট লেখক তথা সমাজকৰ্মী ধৰম ছিং টেৰণক ৰাজহুৱা সম্বৰ্ধনা জ্ঞাপন কৰা হয় ৷
লগতে পঢ়ক : আৰোহণৰ অধীনত বৰপেটাত ছাত্ৰ-ছাত্ৰীৰে মত-বিনিময় : জিলা আয়ুক্ত-আৰক্ষী অধীক্ষকৰ অংশগ্ৰহণ - Arohan
