লখিমপুৰ 14 মে’ : এগৰাকী মহিলাৰ মৃত্যুৰ ঘটনাক কেন্দ্র কৰি সোমবাৰে বিয়লি লখিমপুৰৰ বগীনদী অঞ্চলত একাংশ মহিলাই প্ৰতিবাদ সাব্যস্ত কৰি উত্তাল পৰিৱেশ সৃষ্টি কৰে । এগৰাকী মহিলাৰ হত্যাকাৰীক গ্ৰেপ্তাৰৰ দাবীত মহিলাসকলে এনেদৰে প্ৰতিবাদ সাব্যস্ত কৰে ৷
ঘটনাৰ বিৱৰণি অনুসৰি, যোৱা 7 মে'ত লখিমপুৰ জিলাৰ ভীমপৰা বালিজানৰ অৱন্তী দাস নামৰ মহিলাগৰাকীক অময়াজ্যোতি দাস নামৰ এগৰাকী মহিলাৰ ভেৰোণীয়া গুণ্ডাই নিৰ্মমভাৱে হত্যা কৰাৰ অভিযোগ উত্থাপন কৰে মহিলাসকলে ৷ এই জঘন্য হত্যাৰ পিচতে বগীনদী থানাত মৃতকৰ পৰিয়ালে গোচৰ তৰিছিল ৷ কিন্তু আশ্বৰ্যজনকভাৱে আজি পৰ্যন্ত বগীনদী আৰক্ষীয়ে দোষীক উপযুক্ত শাস্তিৰ ব্যৱস্থা কৰা নাই ৷
তাৰ পিচতে সোমবাৰে দোষীৰ বিৰুদ্ধে ব্যৱস্থা গ্ৰহণ নকৰাৰ অভিযোগ তুলি জাগৃত নাৰী শক্তি অসমৰ সম্পাদিকাৰ নেতৃত্বত 15 নং ৰাজপথৰ কাষত শ শ মহিলাই এইদৰে প্ৰতিবাদী কাৰ্যসূচী গ্রহণ কৰিছে ৷ বগীনদী থানাৰ ভাৰপ্ৰাপ্ত আৰক্ষী বিষয়া প্ৰবীণ ভেৰুৱাক তীব্র ভাষাৰে সমালোচনা কৰে প্ৰতিবাদকাৰী মহিলাসকলে ৷
প্ৰতিবাদকাৰীসকলে অ’চি গ’ বেক, বগীনদী আৰক্ষী মুৰ্দাবাদ, হত্যাকাৰীক গ্ৰেপ্তাৰ কৰক আদি শ্ল’গানেৰে আৰক্ষীক কঠোৰ ভাষাৰে গৰিহনা দিয়ে ৷ আনকি হত্যাকাৰীক বগীনদী আৰক্ষীয়ে ৰক্ষণাবেক্ষণ দিয়াৰো অভিযোগ তোলে মহিলাসকলে । অচিৰেই হত্যাকাৰীক উপযুক্ত শাস্তি বিহিবলৈ দাবী জনায় প্ৰতিবাদকাৰী মহিলাসকলে ৷ অন্যথা আগন্তুক দিনত প্ৰতিবাদকাৰী মহিলা সংগঠনটোৱে বগীনদী থানা ঘেৰাও কৰি জংগী আন্দোলন কৰিব বুলি হুংকাৰ প্ৰদান কৰে ৷
এতিয়া পৰৱৰ্তী সময়ত আৰক্ষীয়ে কেনেধৰণৰ পদক্ষেপ গ্ৰহণ কৰিব সেয়াহে হ’ব লক্ষণীয় ৷ বগীনদী আৰক্ষী থানাৰ আৰক্ষীয়ে প্ৰকৃততে ৰক্ষণবেক্ষণ দিছে নেকি হত্যাকাৰীক ?
লগতে পঢ়ক: শিহৰণকাৰী পথ দুৰ্ঘটনাৰ দৃশ্য বন্দী CCTV ত - accident in jorhat
