তেজপুৰত বন্যহস্তী আৰু ম'হৰ সন্ত্ৰাস, সষ্টম বন বিভাগ - Assam Flood 2024

Assam Flood 2024: বানৰ ফলত শোণিতপুৰ জিলাৰ বুঢ়াচাপৰি বনাঞ্চলৰ কেইবাটাও বন শিবিৰ প্লাৱিত হৈছে । বনাঞ্চলৰ বহু বন্যপ্ৰাণীয়ে জনাঞ্চলত প্ৰৱেশ কৰিছে । হাতী আৰু বনৰীয়া ম'হৰ মুক্ত বিচৰণক লৈ আতংকিত হৈছে সাধাৰণ ৰাইজ । বনৰীয়া ম'হৰ আক্ৰমণত আহত কেইবাজনো লোক ।

তেজপুৰ, ৪ জুলাই : ৰাজ্যৰ বিভিন্ন প্ৰান্তত বানে ভয়ংকৰ ৰূপ ধাৰণ কৰিছে । শোণিতপুৰ জিলাৰ বিভিন্ন অঞ্চলো বানৰ কৱলত পৰিছে । জিলাখনৰ বুঢ়াচাপৰি বনাঞ্চলৰ বিভিন্ন শিবিৰ ব্ৰহ্মপুত্ৰৰ বাঢ়নী পানীয়ে বুৰাই পেলাইছে । এনে পৰিস্থিতিত বনাঞ্চলৰ বহু বন্যজন্তুৱে ওখ ঠাইত আশ্ৰয় লৈছে আৰু জনাঞ্চলত প্ৰৱেশ কৰিছে ।

উল্লেখ্য যে ৩ দিন পূৰ্বে পোৱালিসহ প্ৰায় ৬ টা হাতী তেজপুৰ কলিবাৰীস্থিত উত্তৰ অসমৰ আৰক্ষী মহাপৰিদৰ্শকৰ কাৰ্যালয়ৰ সমীপত আশ্ৰয় লৈছে । এনে পৰিস্থিতিত অঞ্চলটোৰ লোকসকল আতংকিত হৈ পৰিছে । ইফালে যোৱা নিশাৰে পৰা হাতীৰ জাকটোৰ ৪ টা হাতীয়ে তেজপুৰ দ' পৰ্বতীয়াৰ পৰা আহি অগ্নিগড়ৰ সমীপত অৱস্থান কৰিছে । ইফালে এটা পোৱালিসহ দুটা হাতীয়ে দ' পৰ্বতীয়া অঞ্চলত অৱস্থান কৰিছে আৰু বন বিভাগে নিৰীক্ষণত ৰাখিছে ।

লক্ষণীয়ভাৱে বানৰ ফলত শোণিতপুৰ জিলাত ৩ জন লোকে প্ৰাণ হেৰুৱাইছে । জীয়াভৰলী নদীৰ সোঁতত দুলাবাৰীৰ আবচনা বেগম নামৰ এগৰাকী মহিলা উটি যায় আৰু বুঢ়াচাপৰিৰ সিংহবীৰ ছেত্ৰী আৰু তেজপুৰ কলিবাৰীৰ মোলান দাস নামৰ এজন লোকো ব্ৰহ্মপুত্ৰৰ পানীত উটি যায় । ইয়াৰে ছেত্ৰীৰ মৃতদেহ নদীৰ পাৰত উদ্ধাৰ হয় আৰু দাসৰ মৃতদেহ এতিয়ালৈ উদ্ধাৰ হোৱা নাই ।