মাজুলী, ২১ আগষ্ট : বানৰ পাছত এইবাৰ মাজুলীৰ কৃষকৰ মাজলৈ নামি আহিছে আন এক দুৰ্যোগ । কপালৰ ঘাম মাটিত পেলাই অশেষ কষ্টৰে ৰোৱা খেতি পথাৰত এতিয়া অচিন পোকৰ উপদ্ৰৱ । পূব মাজুলী অঞ্চলৰ শেনচোৱা, বনগাঁও, ঠাকুৰবাৰী চাপৰিত শুকান ধানখেৰ সদৃশ হৈছে সজাল ধৰা ধাননি । যি সময়ত ধাননি পথাৰ হ'ব লাগিছিল সেউজীয়া, সেই সময়ত হ'লগৈ হালধীয়া ।
কৃষি বিভাগৰ বিৰুদ্ধে কৃষকৰ ক্ষোভ :
এই অচিন পোকৰ উপদ্ৰৱৰ পৰা পৰিত্ৰাণ বিচাৰি জিলাখনৰ কৃষি বিভাগক আবেদন-নিবেদন কৰাৰ পিচতো কোনো সুফল নোপোৱাৰ অভিযোগ উত্থাপন কৰিছে ভুক্তভোগী খেতিয়ক ৰাইজে । কৃষি বিভাগে কোনো ধৰণৰ ব্য়ৱস্থা গ্ৰহণ নকৰাত কৃষিজীৱী ৰাইজৰ মাজত সৃষ্টি হৈছে হাহাকাৰ পৰিস্থিতিৰ । আশাৰে কৰা খেতি কেইডৰাৰ এনে ৰূপ দেখি কৃষকসকলে কাঢ়িছে হুমুনিয়াহ । খেতি কৰি পৰিয়াল পোহপাল দিয়া কৃষকসকলে কি দৰে বছৰটোৰ বাকীছোৱা সময়ত পৰিয়ালক পোহপাল দিব তাক লৈ চিন্তাত পৰিছে ।
ক্ষতিগ্ৰস্ত কৃষকৰ খবৰ লোৱা নাই বিধায়কে :
এইক্ষেত্ৰত একাংশ ভুক্তভোগী কৃষকে অভিযোগ উত্থাপন কৰি কয়, "এয়া কেৱল আমাৰ গাঁৱৰে সমস্য়া নহয়, সমগ্ৰ মাজুলীতেই খেতিপথাৰত এনে পোকৰ আক্ৰমণ দেখিবলৈ পোৱা গৈছে । কৃষকৰ সমস্যাৰ প্ৰতি জিলা কৃষি বিভাগে তিলমানো গুৰুত্ব প্ৰদান কৰা নাই । কৃষকসকলে বাৰে বাৰে অৱগত কৰাৰ পিচতো আনকি কৃষি বিভাগে কোনো ধৰণৰ কীটনাশক ঔষধ যোগান ধৰা নাই ।"
এইসকল কৃষকে মাজুলীৰ বিধায়ক ভূৱন গামৰ বিৰুদ্ধেও ক্ষোভ প্ৰকাশ কৰে । তেওঁলোকে অঞ্চলটোৰ কৃষকসকলৰ অৱস্থাৰ বুজ লৈ শীঘ্ৰেই সহায়ৰ হাত আগবঢ়াবলৈ বিধায়ক ভুৱন গামক আহ্বান জনায় ।
