গুৱাহাটী : বাংলাদেশৰ পৰা ভাৰত-বাংলাদেশ সীমান্তৰে অসমত প্ৰৱেশ কৰাৰ চেষ্টা কৰা দুজন বাংলাদেশী অনুপ্ৰৱেশকাৰীক অসম আৰক্ষীয়ে পুনৰ আটক কৰিবলৈ সক্ষম হৈছে । মুখ্যমন্ত্ৰী ড৹ হিমন্ত বিশ্ব শৰ্মাই শুক্ৰবাৰে ছ’চিয়েল মিডিয়াৰ জৰিয়তে এই কথা সদৰী কৰে ।
মুখ্যমন্ত্ৰীয়ে ছ’চিয়েল মিডিয়াত কয়, ‘‘অসম আৰক্ষীৰ এটি দলে কৰিমগঞ্জৰ আন্তঃৰাষ্ট্ৰীয় সীমান্তৰ ওচৰত কবীৰ শিখধৰ আৰু ছেলিম নামৰ দুজন বাংলাদেশী নাগৰিকক আটক কৰি সীমান্তৰ সিপাৰে ওভতাই পঠিয়ায় । অনুপ্ৰৱেশ ৰোধৰ ক্ষেত্ৰত আমাৰ এই প্ৰয়াস নিৰন্তৰ চলি থাকিব ৷ অসম আৰক্ষীৰ শলাগ ল'লোঁ ৷’’
মন কৰিবলগীয়া যে, ৰাজ্যৰ ৰাজনৈতিক (খ) বিভাগে জাৰি কৰা শেহতীয়া নিৰ্দেশনাত কোৱা হৈছে যে যোৱা জানুৱাৰী মাহৰ পৰা আগষ্ট পৰ্যন্ত ৫৪ জন অবৈধ অনুপ্ৰৱেশকাৰীক কৰায়ত্ত কৰা হৈছে । ইয়াৰে ৪৫ জনক সীমা পাৰ কৰি তেওঁলোকৰ দেশলৈ প্ৰেৰণ কৰা হৈছে আৰু ৯ জনক কৰিমগঞ্জত গ্ৰেপ্তাৰ কৰা হৈছে ।
ইয়াৰ লগতে ৰাজ্যখনত বিশেষকৈ উজনি অসম আৰু উত্তৰ অসমৰ জিলাকেইখনত সন্দেহজনক বিদেশীৰ উপস্থিতি ধৰা পৰিছে । ৰাষ্ট্ৰৰ আভ্যন্তৰীণ নিৰাপত্তাৰ প্ৰতি সম্ভাব্য ভাবুকি কঢ়িয়াই অনাৰ আশংকাৰ প্ৰতি লক্ষ্য ৰাখি অসম আৰক্ষীৰ সীমান্ত শাখাক অবৈধ অনুপ্ৰৱেশকাৰীৰ চিনাক্তকৰণৰ আৰু বিতাড়নৰ বাবে সকলো প্ৰয়োজনীয় ব্যৱস্থা গ্ৰহণ কৰিবলৈ নিৰ্দেশ দিয়া হৈছে ।
We have a zero tolerance policy towards infiltration, particularly by Rohingyas. In last 2 months, Assam has intercepted 130+ illegal immigrants.
— Himanta Biswa Sarma (@himantabiswa) October 24, 2024
12 new police stations near the Indo-Bangla Border is in the pipeline to enhance coordination with Central agencies. pic.twitter.com/TFWPaQklGl
আনহাতে, কিছুদিন পূৰ্বে মুখ্যমন্ত্ৰী ড৹ হিমন্ত বিশ্ব শৰ্মাই এক্স হেণ্ডেলযোগে অসমত অবৈধ অনুপ্ৰৱেশ বন্ধ কৰাৰ বাবে কেন্দ্ৰীয় সংস্থাসমূহৰ সৈতে সমন্বয় বৃদ্ধিৰ বাবে অসমৰ ভাৰত-বাংলা সীমান্তত ১২খন নতুন থানা গঠন কৰাৰ কথা সদৰী কৰে ৷
