গুৱাহাটী, ২২ ছেপ্টেম্বৰ : শক্তিপীঠ হিচাপে পৰিচিত শ্ৰীশ্ৰী কামাখ্যা মন্দিৰত পৰম্পৰাগতভাৱে অহা ২৫ ছেপ্টেম্বৰত কৃষ্ণ নৱমী পূজাৰে পৰা এইবেলি শাৰদীয় দুৰ্গা পূজাৰ শুভাৰম্ভ কৰা হ’ব । শনিবাৰে কামাখ্যা মন্দিৰৰ অতিথিশালাত আয়োজিত এক সংবাদমেলত আগন্তুক দুৰ্গা পূজাৰ কাৰ্যসূচীৰ বিষয়ে সদৰী কৰে কামাখ্যা বৰদেউৰী সমাজৰ বৰদলৈ কৱীন্দ্ৰ প্ৰসাদ শৰ্মাই ৷
তেওঁ কয় যে ২৫ ছেপ্টেম্বৰৰ দিনৰ ২ বজাত মন্দিৰৰ দুৱাৰ বন্ধ কৰা হ’ব । সিদিনা পুৱা নিত্যপূজাৰ পিচত দেৱালয়ৰ দুৱাৰ যাত্ৰীৰ বাবে খোলা হ’ব আৰু মাত্ৰ দুই হাজাৰ ভক্ত বা যাত্ৰীকহে গর্ভগৃহ দৰ্শনৰ সুবিধা দিয়া হ’ব । মূৰ্তি দৰ্শনৰ বাবে পুৱা ৭ বজাৰ পৰা আবেলি ২ বজালৈ ব্যৱস্থা থাকিব । সিদিনা ভি আই পিৰ বিশেষ দর্শনৰ ব্যৱস্থা বন্ধ থাকিব ৷ ২৬ ছেপ্টেম্বৰৰ পৰা ৯ অক্টোবৰলৈ পুৱা ৮.৩০ বজাত মন্দিৰৰ দুৱাৰ মুকলি কৰা হ’ব । সেইকেইদিনত বিশেষ দৰ্শনৰ ব্যৱস্থা সীমিত ৰখা হৈছে ।
১০ অক্টোবৰ সপ্তমী পূজাৰ দিনা পুৱা ১০ বজাত মন্দিৰৰ দুৱাৰ খোলা হ’ব ৷ বিয়লি মন্দিৰৰ দুৱাৰ বন্ধ কৰি দেৱীৰ ভোগ আৰু আৰতি সমাপন কৰা হ’ব ৷ সিদিনাও ভি আই পিৰ বিশেষ দর্শনৰ ব্যৱস্থা বন্ধ থাকিব ৷ ১১ অক্টোবৰত অষ্টমী আৰু নৱমী পূজাৰ বাবে আবেলি ডেৰ বজাত মন্দিৰৰ দুৱাৰ খোলা হ’ব । সিদিনা ১,২০০ গৰাকী যাত্ৰীৰহে গৰ্ভগৃহত দৰ্শনৰ ব্যৱস্থা থাকিব ।
পুৱা দেৱীৰ স্নান পৰ্বৰ পিচত যাত্ৰীসকলে ১নং গেটেৰে দেৱীৰ প্ৰতিমূৰ্তি দৰ্শন কৰিব পাৰিব । পুৱা ১০ বজাৰ পিচত ২ নং গেটেৰেহে দেৱীৰ প্ৰতিমূৰ্তি দর্শনৰ ব্যৱস্থা গ্ৰহণ কৰা হৈছে । সিদিনাও ভি আই পিৰ বিশেষ দর্শনৰ ব্যৱস্থা বন্ধ থাকিব । ১২ অক্টোবৰ দশমী পূজাৰ দিনা পুৱা ১০ বজাত মন্দিৰৰ দুৱাৰ খোলা হ’ব । দুপৰীয়া ভোগ নিবেদনৰ পিচতে আবেলি ১ বজাত মন্দিৰৰ দুৱাৰ বন্ধ কৰা হ’ব । সিদিনাই কামাখ্যা দেৱালয়ত দুৰ্গা পূজাৰ সামৰণি পাৰিব ।
