বাইহাটা চাৰিআলি, ৩১ আগষ্ট: কামৰূপ জিলাৰ কমলপুৰ থানাৰ অন্তৰ্গত নিজমদাৰতলাত আজি অৰ্থাৎ শনিবাৰে এক শোকাৱহ ঘটনা সংঘটিত হয় । পুখুৰীত মাছ মাৰিবলৈ গৈ মৃত্যু ঘটিল তিনি কিশোৰৰ । মৃত কিশোৰ তিনিটি কৰৰা উচ্চতৰ মাধ্যমিক বিদ্যালয়ৰ একাদশ শ্ৰেণীৰ ছাত্ৰ আকাশদ্বীপ ডেকা(হিমাংশু), আগডলা চাৰিআলি উচ্চতৰ মাধ্যমিক বিদ্যালয়ৰ চতুৰ্থ শ্ৰেণীৰ ছাত্ৰ ক্ৰমে ৰাজদ্বীপ ডেকা আৰু অংকুৰ বৈশ্য বুলি চিনাক্ত কৰা হৈছে ৷
পথাৰলৈ মাছ মাৰিবলৈ গৈছিল কিশোৰ তিনিটি:
আজি দিনৰ প্ৰায় ১১.৩০ বজাত নিজমদাৰতলাস্থিত নিজ ঘৰৰ পৰা কিশোৰ তিনিওজনে পথাৰলৈ মাছ মাৰিবলৈ ওলাই গৈছিল । বহু সময় ধৰি কিশোৰ তিনিটি ঘৰলৈ উভতি নহাত পৰিয়ালৰ লোক চিন্তিত হৈ পৰে ৷ তেওঁলোকে লগে লগে প্ৰতিবেশী লোকৰ সহায়ত কিশোৰ তিনিটিৰ সন্ধানত বিচাৰ খোঁচাৰ আৰম্ভ কৰে ৷
লগতে পঢ়ক: মৰ্মান্তিক: খেলি থাকোতেই সলিল সমাধি দুটি শিশুৰ - Minor Death By Drowning
বিয়লি পুখুৰীত উদ্ধাৰ কিশোৰ তিনিটিৰ মৃতদেহ:
গাঁওখনৰ লোকে বহু বিচাৰ-খোচাৰ কৰাৰ পাছত বিয়লি প্ৰায় ৪.৩০ বজাত গোপালথানৰ সন্মুখত থকা পথাৰৰ মাজত এস্ককেভেটৰেৰে খন্দা পুখুৰীত কিশোৰ তিনিটিক মৃত অৱস্থাত উদ্ধাৰ কৰে । স্থানীয় লোকে পাছত কমলপুৰ আৰক্ষীৰ উপস্থিতিত মৃতদেহ তিনিটা উদ্ধাৰ কৰে । আৰক্ষীয়ে মৃতদেহ কেইটা চমজি লৈ মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰে ।
মৃত কিশোৰ তিনিটিৰ দুই ভাই-ককাই:
মৃত কিশোৰ তিনিটিৰ আকাশদ্বীপ ডেকা(হিমাংশু) আৰু ৰাজদ্বীপ ডেকা সহোদৰ ভাতৃ ৷ তেওঁলোক নিজমদাৰতলা গাঁৱৰ গাওঁপ্ৰধান লক্ষ্যধৰ ডেকাৰ জ্যেষ্ঠ পুত্ৰ আকাশদ্বীপ ডেকা আৰু কনিষ্ঠ পুত্ৰ ৰাজদ্বীপ ডেকা ৷ ইফালে অংকুৰ বৈশ্য একে গাঁৱৰে তৰণী বৈশ্যৰ একমাত্ৰ পুত্ৰ ৷
লগতে পঢ়ক: গা ধুবলৈ গৈ সলিল সমাধি একে পৰিয়ালৰ দুই ছাত্ৰৰ - Students Death By Drowning
