তিনিচুকীয়া, 3 জুন : ক্ষুদ্ৰ চাহ খেতিয়কৰ কেঁচা চাহপাত বটলিফ্ ফেক্টৰীত 1 জুনৰ পৰা নোলোৱাৰ সিদ্ধান্তৰ বিৰুদ্ধে সৰৱ হৈ পৰিছে ক্ষুদ্ৰ চাহ খেতিয়ক সন্থাৰ লগতে বিভিন্ন দল-সংগঠন ৷ বটলিফ্ ফেক্টৰীত ক্ষুদ্ৰ চাহ খেতিয়কৰ কেঁচা চাহপাত নোলোৱাৰ পিচতে এতিয়া পানীত হাঁহ নচৰা অৱস্থাৰ সৃষ্টি হৈছে ৰাজ্যৰ 15 লক্ষাধিক ক্ষুদ্ৰ চাহ খেতিয়কৰ ৷ কেঁচা চাহপাতত ৰাসায়নিক পদাৰ্থ উপস্থিতিৰ হেতু এই সিদ্ধান্ত লৈছে বটলিফ্ ফেক্টৰীসমূহে ৷ এই সিদ্ধান্তৰ বিৰুদ্ধে ইতিমধ্যে ক্ষুদ্ৰ চাহ খেতিয়কৰ লগতে বিভিন্ন দল-সংগঠনে ৰাজ্যজুৰি সাব্যস্ত কৰিছে তীব্ৰ প্ৰতিবাদ ৷
ইয়াৰ মাজতে সোমবাৰে পুনৰ তিনিচুকীয়াৰ ভাৰতীয় চাহ ব’ৰ্ডৰ কাৰ্যালয়ৰ সন্মুখত তিনিচুকীয়া জিলা ক্ষুদ্ৰ চাহ খেতিয়ক সন্থাই ক্ষুদ্ৰ চাহ খেতিয়কসকলৰ সহযোগত সাব্যস্ত কৰে প্ৰতিবাদ ৷ প্ৰতিবাদস্থলীৰ পৰা অনতিপলমে ক্ষুদ্ৰ চাহ খেতিয়সকলৰ সমস্যা সমাধানৰ দাবী জনায় প্ৰতিবাদকাৰীসকলে ৷
প্ৰতিবাদৰ পিচত পৰৱৰ্তী সময়ত ভাৰতীয় চাহ ব’ৰ্ডৰ বিষয়ববীয়াৰ সৈতে এক আলোচনাত মিলিত হয় সদৌ মৰাণ ছাত্ৰ সন্থাৰ নেতৃত্ব ৷ তিনিচুকীয়াত থকা ভাৰতীয় চাহ ব’ৰ্ডৰ আঞ্চলিক কাৰ্যালয়ত সদৌ মৰাণ ছাত্ৰ সন্থাৰ নেতৃত্ব আলোচনাত মিলিত হৈ ক্ষুদ্ৰ চাহ খেতিয়কৰ সমস্যাসমূহ সমাধানৰ দাবী জনায় ৷ লগতে অনাগত দিনতো ক্ষুদ্ৰ চাহ খেতিয়ক সকলৰ আন্দোলনলৈ ছাত্ৰ সংগঠনটোৰ সমৰ্থন থাকিব বুলি সদৰী কৰে সংগঠনোটোৰ সাধাৰণ সম্পাদক জয়কান্ত মৰাণে ৷
উল্লেখ্য যে, ক্ষুদ্ৰ চাহ খেতিয়কৰ কেঁচা চাহপাত বটলিফ পেক্টৰী সমূহে নোলোৱাৰ বিৰুদ্ধে ইতিমধ্যে বিগত কেবাদিন ধৰি উত্তাল হৈ আছে ৰাজ্য ৷ ক্ষুদ্ৰ চাহ খেতিয়কৰ লগতে বিভিন্ন দল-সংগঠনে এই সিদ্ধান্তৰ বিৰুদ্ধে ৰাজ্যজুৰি সাব্যস্ত কৰিছে তীব্ৰ প্ৰতিবাদ ৷
লগতে পঢ়ক : চাহ ব'ৰ্ড-মুখ্যমন্ত্ৰীক কেঁচা চাহপাত ক্ৰয় বিবাদ নিষ্পত্তি কৰিবলৈ দাবী আটাছুৰ - Conflict On Raw Tea Leaves
লগতে পঢ়ক : বটলিফ ফেক্টৰীয়ে কিয় নলয় ক্ষুদ্ৰ চাহ খেতিয়কৰ কেঁচা চাহপাত ? - Small Tea Growers
