জোনাই, 30 জুন: বাৰিষাৰ লগে লগে বানৰ কবলত পৰিছে কেবাখনো জিলা ৷ ব্ৰহ্মপুত্ৰৰ লগতে ইয়াৰ উপনৈ সমূহৰ বাঢ়নী পানীয়ে প্লাৱিত কৰিছে বিস্তীৰ্ণ অঞ্চল ৷ ইয়াৰ মাজতে ধেমাজি জিলাৰ জোনাইৰ শিৱগুৰিত চিয়াং নদীত সংঘটিত হৈছে এক অঘটন ৷ বানাক্ৰান্তক উদ্ধাৰ কৰিবলৈ যোৱা SDRF ৰ এখন ৰবট ব’ট চিয়াঙৰ বুকুত ডুব যায় ৷ নাওখনত আছিল 9 গৰাকীকৈ SDRF ৰ বিষয়া আৰু জোৱান ৷ নাওখন ডুব যোৱাৰ পিচত তেওঁলোকে কোনোমতে সাঁতুৰি নিজৰ জীৱন ৰক্ষা কৰে ৷
জানিব পৰা মতে, শনিবাৰে শিৱগুৰিত বন্যাৰ্তক উদ্ধাৰৰ বাবে গৈছিল SDRF ৰ দলটো ৷ উদ্ধাৰ অভিযান সামৰি দেওবাৰে তেওঁলোক ঘূৰি আহিছিল যদিও দিনৰ 2 মান বজাত ওভতনি পথত নাওখন ডুব যায় ৷ নাওখনত থকা SDRF ৰ লোককেইজনে নিজৰ প্ৰাণ ৰক্ষা কৰি নিৰাপদ স্থানত আশ্ৰয় গ্ৰহণ কৰে ৷
ভাৰতীয় সেনা বাহিনী আৰু বায়ুসেনাৰ এক যুটীয়া অভিযানত সেনাবাহিনীৰ হেলিকপ্টাৰৰ সহায়ত দেওবাৰে সন্ধিয়া উদ্ধাৰ কৰা হয় দলটোক ৷ তেওঁলোকক ডিব্ৰুগড়লৈ অনা বুলি জানিব পৰা গৈছে ৷ তেওঁলোক হৈছে প্ৰশান্ত পেগু, দীপজ্যোতি ভৰালী, বিকাশ পাটগিৰি, বিমান চেতিয়া, জগদীশ হাজৰিকা, বেদান্ত বৰা, অভিজিৎ হাজৰিকা আৰু তোলন দলে ৷ লগতে জোনাই ৰাজহ চক্ৰৰ এগৰাকী উপ-পঞ্জীয়কো আছে দলটোত ৷
লগতে পঢ়ক: ধেমাজিৰ কেইবা স্থানতো অপৰিৱৰ্তিত বানপৰিস্থিতি, গাই নদীয়ে ধৰিছে কালৰূপ - Assam flood 2024
অসম-অৰুণাচল সীমান্তত কেইবাদিনো ধৰি হৈ থকা নেৰানেপেৰা বৰষুণৰ ফলত জোনাই মহকুমাৰ চিলে গাঁও পঞ্চায়তৰ অন্তৰ্গত ওপৰ কবুৰ শিৱগুৰি গাঁওখন সমপূৰ্ণৰূপে বানপানীত ডুব গৈছে । ব্ৰহ্মপুত্ৰৰ জলস্তৰ বৃদ্ধি পোৱাৰ পিচতে ব্ৰহ্মপুত্ৰৰ উপনৈ চিয়াং-দিবাং আৰু দতুং নদীৰ বানে সম্পূৰ্ণৰূপে প্লাৱিত কৰিছে সমগ্ৰ গাঁওখন । ইফালে শনিবাৰে পুৱাৰে পৰা দ্ৰুত গতিত পানী বৃদ্ধি হোৱাৰ পিচতে জোনাই মহকুমা প্ৰশাসন আৰু SDRF বাহিনীৰ দলে গাঁওখনত উপস্থিত হৈ শিশু মহিলাসহ শতাধিক লোকক নিশা উদ্ধাৰ কৰে ৷
বৰ্তমান বানবিধস্ত ৰাইজক জোনাই উচ্চতৰ মাধ্যমিক বিদ্যালয়ত অস্থায়ী আশ্ৰয় শিবিৰ পাতি মহকুমা প্ৰশাসনে থকাৰ ব্যৱস্থা কৰি দিছে ৷
লগতে পঢ়ক: আহাৰৰ বলিয়া বানত জুৰুলা ৰাজ্যৰ জনতা - ASSAM FLOOD 2024
লগতে পঢ়ক: নীপকোৱে এৰিলে ৰঙানদী বান্ধৰ পানী; আতংকিত লখিমপুৰবাসী - NEEPCO
