কলিয়াবৰ, ৩ জুলাই: ৰাজ্যৰ ২৮ খন জিলাত বানে প্রলয়ংকৰী ৰূপ ধাৰণ কৰিছে । মুষলধাৰ বৰষুণৰ ফলত ক্ৰমাৎ জটিল হৈ পৰিছে ৰাজ্যৰ বান পৰিস্থিতি । ঘৰ-বাৰী এৰি ওখ নিৰাপদ স্থানলৈ ঢাপলি মেলিছে বানাক্রান্তই । মুখ্যমন্ত্ৰী ড৹ হিমন্ত বিশ্ব শৰ্মাই বানপীড়িত ৰাইজক সাহায্য আগবঢ়োৱাত যাতে কোনোধৰণৰ কৃপণালি নকৰে তাৰ বাবে প্ৰশাসনক কঠোৰ নিৰ্দেশনা জাৰি কৰিছে । কিন্তু মুখ্যমন্ত্ৰী ড৹ হিমন্ত বিশ্ব শৰ্মাৰ এনে নিৰ্দেশনাৰ পিচতো বানাক্ৰান্তই উপযুক্ত সাহাৰ্য নোপোৱাৰ অভিযোগ উত্থাপিত হৈছে । ইপিনে, বুধবাৰে কলিয়াবৰত ৰাইজে ৰাজপথলৈ ওলাই আহি মন্ত্ৰী আৰু জলসম্পদ বিভাগৰ বিৰুদ্ধে বিভিন্ন শ্লোগান দিয়ে । প্ৰতিবাদকাৰীসকলে বান সমস্য়া সমাধানৰ বাবে দাবী জনায় ।
৭১৫ নং ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্য়স্ত কৰিলে জখলাবন্ধা উচ্চতৰ মাধ্যমিক বিদ্যালয়, কলিয়াবৰ প্ৰেছ ক্লাব আৰু ৰাষ্ট্ৰীয় ঘাইপথৰ দাঁতিত আশ্ৰয় লোৱা বানপীড়িতই । ২০১৫ চনৰ বানৰ ভয়াবহ ছবিখন মনৰ পৰা আঁতৰি নাযাওতেই মঙলবাৰে কলংমুখৰ হাতীমূৰা মথাউৰি ছিগি পুনৰ কলিয়াবৰত বানৰ সৃষ্টি হয় । ইয়াৰ পিচতেই বুধবাৰে স্থানীয় বিধায়ক তথা মন্ত্ৰী কেশৱ মহন্তৰ বিৰুদ্ধে পঞ্জীভূত ক্ষোভৰ বহিঃপ্ৰকাশ ঘটে । অৰৰোধ কৰে পথ ।
লগতে পঢ়ক:আহাৰমহীয়া বানৰ বিভীষিকা: ক্ষতিগ্ৰস্ত 11,34,446 লোক, মৃতকৰ সংখ্যা 38 লৈ বৃদ্ধি - ASSAM FLOOD 2024
