গুৱাহাটী, ২৬ জুন: অসমৰ মহাবিদ্যালয়সমূহত এতিয়া উচ্চতৰ মাধ্যমিক আৰু স্নাতক শাখাত বিনামূলীয়া নামভৰ্তিক লৈ ৰাজ্যত বিতৰ্ক অব্যাহত থকাৰ মাজতে মুখ্যমন্ত্ৰী ড৹ হিমন্ত বিশ্ব শৰ্মাই তৎপৰ হৈ বিষয়টোত হস্তক্ষেপ কৰিছে ৷ চৰকাৰী আঁচনি অনুসৰি অসমৰ মহাবিদ্যালয়ত বিনামূলীয়া নামভৰ্তি কৰি সময়মতে চৰকাৰৰ পৰা ধন লাভ নকৰি ৰাজ্যৰ বহু মহাবিদ্যালয় আৰ্থিক দুৰ্যোগত পৰা বিষয়টোৱে ৰাজ্যৰ শিক্ষা বিভাগত জোকাৰণি তুলিছে ৷
মুখ্যমন্ত্ৰী হিমন্ত বিশ্ব শৰ্মাই বুধবাৰে এই বিনামূলীয়া নামভৰ্তি বিষয়ত শিক্ষাৰ্থীসকলক আস্বস্ত কৰিবলৈ এক বিশেষ ভিডিঅ’ বাৰ্তা প্ৰেৰণ কৰি কয়, “যিসকল শিক্ষাৰ্থীৰ অভিভাৱকৰ বাৰ্ষিক আয় ২ লাখ টকাতকৈ কম তেওঁলোকৰ নামভৰ্তি মাচুল অসম চৰকাৰে বহন কৰি আহিছে । এইক্ষেত্ৰত আমি প্ৰতি বছৰে প্ৰায় ডেৰশ কোটি টকা খৰচ বহন কৰিম, যিটো জুলাই মাহত নিৰ্দিষ্ট মহাবিদ্যালয়সমূহত জমা কৰা হ’ব ।”
লগতে পঢ়ক: সমৰ্থ পৰ্টেল বিতৰ্ক : বিপাঙত শিক্ষাৰ্থী, জাঙুৰ খাই উঠিছে যুৱ ছাত্ৰ পৰিষদ - Samarth Portal
ভিডিঅ’ বাৰ্তাটোত মুখ্যমন্ত্ৰীগৰাকীয়ে কয়, এতিয়া উচ্চতৰ মাধ্যমিক আৰু স্নাতক পৰ্যায়ত নামভৰ্তিৰ প্ৰক্ৰিয়া চলি আছে । বহু মহাবিদ্যালয়ত ইতিমধ্যে নামভৰ্তিকৰণ প্ৰক্ৰিয়া সমাপ্ত হৈছে । তেওঁ লগতে কয়, “মোৰ ওচৰলৈ দুই-এটা খবৰ আহিছে যে বিনামূলীয়া নামভৰ্তি কৰিবলৈ যাওতে কিছু ছাত্ৰ-ছাত্ৰী অসুবিধাৰ সন্মুখীন হৈছে । অসম চৰকাৰে 'প্ৰজ্ঞান ভাৰতী' নামৰ আঁচনিখনৰ জৰিয়তে কেইবাটাও বছৰে নামভৰ্তিৰ ব্যৱস্থা কৰি আহিছে । যদি কোনো ছাত্ৰ-ছাত্ৰীয়ে কোনো সমস্যাৰ সন্মুখীন হয় তেন্তে নিঃসংকোচে উপায়ুক্ত বা শিক্ষা বিভাগৰ সৈতে যোগাযোগ কৰিব পাৰিব ৷”
নামভৰ্তিক লৈ হঠাৎ কিয় মুখ্যমন্ত্ৰীৰ বিশেষ বাৰ্তা:
যোৱা তিনিটা শিক্ষাবৰ্ষত অসম চৰকাৰে 'প্ৰজ্ঞান ভাৰতী' আঁচনিৰ অধীনত মহাবিদ্যালয়সমূহত উচ্চতৰ মাধ্যমিক আৰু স্নাতকত ২ লাখতকৈ কম উপাৰ্জনৰ পৰিয়ালৰ শিক্ষাৰ্থীসকলক বিনামূলীয়া নামভৰ্তিৰ ব্যৱস্থা কৰি আহিছে ৷ চৰকাৰৰ নিৰ্দেশনা অনুযায়ী মহাবিদ্যালয়সমূহেও বিনামূলীয়া নামভৰ্তি কৰি আহিছিল ৷ কিন্তু মহাবিদ্যালয়সমূহে চৰকাৰে দিবলগীয়া ধনসমূহ সময়মতে নিয়মীয়াকৈ আদায় নিদিয়াৰ তথ্যই চৰ্চা লাভ কৰে ৷ যাৰ ফলত মহাবিদ্যালয়সমূহে আৰ্থিক দুৰ্যোগত পৰাৰো অভিযোগ উত্থাপন হয় ৷ সেয়ে নামভৰ্তিক লৈ অনিশ্চয়তাত পৰে বহু দুখীয়া শিক্ষাৰ্থী । সেয়ে শিক্ষাৰ্থীসকলক আস্বস্ত কৰিবলৈকে মুখ্যমন্ত্ৰীগৰাকীয়ে আজি এই বিশেষ বাৰ্তা প্ৰেৰণ কৰে ৷ মুখ্যমন্ত্ৰীগৰাকীয়ে বিনামূলীয়া নামভৰ্তিক লৈ দিশপুৰত শিক্ষা বিভাগৰ সৈতে এখন পৰ্যানোচনা সভাও আয়োজন কৰে ।
লগতে পঢ়ক: সমৰ্থ পৰ্টেল চলোৱাৰ ন্যূনতম ধাৰণাও নাই শিক্ষা বিভাগৰ : উৎপল শৰ্মা - SAMARTH Portal
