নিউজ ডেস্ক, 12 মাৰ্চ: 'কা' বিৰোধী প্ৰতিবাদত উত্তাল সমগ্ৰ ৰাজ্য । কা নামানো শ্ল’গানেৰে জোনাইত অসম জাতীয়তাবাদী যুৱ ছাত্ৰ পৰিষদে সাব্যস্ত কৰে উত্তাল প্ৰতিবাদ । দেশৰ প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহৰ পুত্তলিকা দাহ কৰি তীব্ৰ প্ৰতিবাদ সাব্যস্ত কৰে সংগঠনটোৱে ৷
আনপিনে, শিৱসাগৰ নগৰত কৃষক মুক্তি সংগ্ৰাম সমিতিয়ে সাব্যস্ত কৰে কা বিৰোধী প্ৰতিবাদ । দ'লমুখ চাৰিআলিৰ পৰা বাছ ষ্টেণ্ড তিনিআলিলৈকে প্ৰতিবাদী সমদল গঢ়ি তোলে প্ৰতিবাদকাৰীয়ে । প্ৰতিবাদস্থলীত উপস্থিত আৰক্ষী আৰু দণ্ডাধীশৰ মাজত বাক-বিতণ্ডা হোৱাৰ লগতে প্ৰতিবাদকাৰীসকলৰ লগত খণ্ড যুদ্ধৰ সৃষ্টি হয় । আৰক্ষীয়ে সকলো প্ৰতিবাদীক 144 ধাৰা উলংঘনৰ অপৰাধত আটক কৰে ।
সোমবাৰে শোণিতপুৰ জিলা ছাত্ৰ সন্থাই তেজপুৰৰ মিছন চাৰিআলিত কা আইনৰ প্ৰতিলিপি দাহ কৰি প্ৰতিবাদ সাব্যস্ত কৰে । সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক নিতুল বৰাই কয়, "এই আইন অসমৰ জনসাধাৰণে কোনো কাৰণত মানি লোৱা নাই আৰু নলয় । এই আইনে অসমীয়া জাতিৰ ভাষা-সংস্কৃতি, মাটি-ভেঁটিৰ ওপৰত অবৈধ বিদেশীৰ অধিকাৰ নিশ্চিত কৰি অসমীয়া মানুহৰ অস্তিত্ব বিপন্ন কৰি তুলিব ৷"
সমান্তৰালভাৱে, কা বাতিলৰ দাবীত প্ৰতিবাদমুখৰ হৈ পৰিছে দক্ষিণ কামৰূপো ৷ সদৌ অসম ছাত্ৰ সন্থাৰ ছয়গাঁও আঞ্চলিক সমিতিৰ উদ্যোগত নাগৰিকত্ব সংশোধনী আইন চমুকৈ কা আইন বাতিলৰ দাবীত তীব্ৰ প্ৰতিবাদ সাব্যস্ত কৰে ছয়গাঁও আছুৱে ৷ আৰক্ষীৰ বাধাৰ পিচতো ছয়গাঁৱৰ 17 নম্বৰ ৰাষ্ট্ৰীয় ঘাইপথত কা আইনৰ প্ৰতিলিপি দাহ কৰে প্ৰতিবাদীকাৰীয়ে ৷
ইয়াৰোপৰি, কলিয়াবৰতো সদৌ অসম ছাত্ৰ সন্থাই সাব্যস্ত কৰে 'কা' বিৰোধী প্ৰতিবাদ ৷ মংগলবাৰে ছাত্ৰ সন্থাই সমগ্ৰ ৰাজ্যতে 30 টা জনগোষ্ঠীয় সংগঠনৰ সহযোগত সমগ্ৰ ৰাজ্যতে জোঁৰ সমদলৰ কাৰ্যসূচী গ্ৰহণ কৰিব বুলি জানিব পৰা গৈছে ।
লগতে পঢ়ক : 'কা' বলৱতৰ পিচত ৰাজ্যজুৰি হাইএলাৰ্ট জাৰি; মহানগৰীত নিশ্চিদ্ৰ নিৰাপত্তা ব্যৱস্থা
