গুৱাহাটী, ৯ মাৰ্চ : একে সময়তে ৰাজ্যখনৰ ৫,৫৫,৫৫৫ টা পৰিয়ালে গৃহ প্ৰৱেশ কৰি ৰচনা কৰিলে অভিলেখ । এনেদৰে গৃহ প্ৰৱেশৰ বিশাল কাৰ্যসূচীৰে অসমে দেশৰ ভিতৰতে সৃষ্টি কৰিলে অভিলেখ । প্ৰধানমন্ত্ৰী আৱাস যোজনাৰ অধীনত আজি একেলগে ৫,৫৫,৫৫৫ টা গৃহৰ গৃহ প্ৰৱেশ অনুষ্ঠান সম্পন্ন কৰা হয় । এই গৃহ প্ৰৱেশ কাৰ্যসূচীৰ শুভাৰম্ভনী কৰে প্ৰধানমন্ত্ৰী নৰেন্দ্ৰ মোদীয়ে ।
উল্লেখ্য যে, দুদিনীয়া কাৰ্যসূচীৰে শুকুৰবাৰে অসমত উপস্থিত হয় প্ৰধানমন্ত্ৰী নৰেন্দ্ৰ মোদী । নিশাটো কাজিৰঙাত কটাই পুৱা কাজিৰঙা অভয়াৰণ্যৰ প্ৰাকৃতিক পৰিৱেশৰ মাজত যথেষ্ট সময় কটাই প্ৰধানমন্ত্ৰী মোদীয়ে । ইয়াৰ পাচতে অৰুণাচললৈ ৰাওনা হয় প্ৰধানমন্ত্ৰী । অৰুণাচলৰ কাৰ্যসূচী সামৰি প্ৰধানমন্ত্ৰী আহে যোৰহাটলৈ ।
যোৰহাটত উপস্থিত হৈ প্ৰধানমন্ত্ৰীয়ে যোৰহাটৰ হোলোঙাপাৰস্থিত লাচিত মৈদামত নিৰ্মাণ কৰি উলিওৱা লাচিত বৰফুকনৰ ১২৫ ফুট দৈৰ্ঘৰ ব্ৰঞ্জৰ প্ৰতিমূৰ্তি উন্মোচন কৰে । আনহাতে প্ৰধানমন্ত্ৰীয়ে আহোমৰ পৰম্পৰাগত সাজ-পোচাক পৰিধান কৰি লাচিত বৰফুকনৰ মহান গৌৰৱময় গাথা স্মৰণ কৰি মৈদাম তৰ্পণ কাৰ্যসূচীতো অংশগ্ৰহণ কৰে ।
ইয়াৰ পিচতে প্ৰধানমন্ত্ৰী মোদীয়ে মেলেং মেটেলি ৰাজহুৱা সভাত উপস্থিত হয় । উক্ত সভাৰ পৰাই প্ৰধানমন্ত্ৰীয়ে দেশৰ ভিতৰতে অভিলেখ সৃষ্টি কৰি অসমত একেলগে ৫ লাখ ৫৫ হাজাৰ ৫৫৫ টা প্ৰধানমন্ত্ৰীৰ আবাস যোজনাৰ ঘৰ হিতাধিকাৰীক আনুষ্ঠানিকভাৱে প্ৰদান কৰে ।
উল্লেখ্য যে, মুখ্যমন্ত্ৰী হিমন্ত বিশ্ব শৰ্মা চৰকাৰৰ কাৰ্যকালত দুটা বছৰত ৯ লাখ পৰিয়ালক প্ৰধানমন্ত্ৰীৰ আৱাস যোজনাৰ ঘৰ দিয়া হৈছে । আজি অভিলেখ সৃষ্টিৰে একেলগে ৫,৫৫,৫৫৫ টা পৰিয়ালক প্ৰদান কৰা হয় ঘৰ । প্ৰধানমন্ত্ৰীৰ অনুষ্ঠানটো পঞ্চায়তসমূহত ভাৰ্চুৱেলী উপভোগ কৰাৰ ব্যৱস্থা কৰা হয় ।
লগতে পঢ়ক : গজৰাজক খাদ্য খুৱাই আনন্দিত প্ৰধানমন্ত্ৰী মোদী
আনহাতে প্ৰধানমন্ত্ৰীৰ অনুষ্ঠানত ১০ হাজাৰ লাখপতি বাইদেউ উপস্থিত থাকে । অনুষ্ঠানত লাখপতি বাইদেউৰ জীৱন আধাৰিত বুকলেট উন্মোচন কৰে প্ৰধানমন্ত্ৰীয়ে । ইফালে ৬০ লাখ হিতাধিকাৰীয়ে ভাৰ্চুৱেলী প্ৰধানমন্ত্ৰীৰ অনুষ্ঠান উপভোগ কৰাৰ ব্যৱস্থা কৰা হয় ।
প্ৰধানমন্ত্ৰী আৱাস যোজনাৰ ঘৰ পোৱা সকলক উপহাৰ হিচাপে ৰাজ্য চৰকাৰৰ তৰফৰ পৰা ঘৰে ঘৰে মিঠাইৰ টোপোলা প্ৰদান কৰাৰ ব্যৱস্থা কৰা হয় । অনুষ্ঠানত প্ৰধানমন্ত্ৰীয়ে ভাষণত কয় যে আজি অসমৰ ৫,৫৫,৫৫৫ পৰিয়ালৰ পকী ঘৰৰ সপোন পূৰণ হ'ল । দ্ৰুত বিকাশৰ দিশে ধাৱমান হোৱা অসমৰ ইমান সংখ্যক লোকে একেদিনাই নিজৰ ঘৰলৈ যাবলৈ সক্ষম হৈছে ।
এই সেৱা প্ৰদান কৰিব পাই নিজকে ধন্য মানি প্ৰধানমন্ত্ৰীয়ে কয় যে কংগ্ৰেছৰ দিনত এটা এটা ঘৰৰ বাবে মানুহে সংগ্ৰাম কৰিব লগীয়া হৈছিল । এতিয়া আমাৰ চৰকাৰে প্ৰতি দিনে ঘৰ দিবলৈ সক্ষম হৈছে । আজি এদিনতে অসমৰ ৫,৫৫,৫৫৫ পৰিয়ালে ঘৰ লাভ কৰিছে ।
এই ঘৰৰসমূহত শৌচালয়, গেছৰ সংযোগ, বিজুলী সংযোগ, টেপ যোগে পানীৰ ব্যৱস্থা আদি সকলো সুবিধা সংযুক্ত হৈ আছে । অসমত এতিয়ালৈকে ১৮ লাখ পৰিয়ালক এনে পকী ঘৰ দিয়া হৈছে বুলি সদৰী কৰি প্ৰধানমন্ত্ৰীয়ে কয় যে প্ৰধানমন্ত্ৰী আৱাস যোজনাৰ বেছিভাগ ঘৰ মহিলাৰ নামত পঞ্জীয়ন কৰা হৈছে । অৰ্থাৎ মহিলাসকল হৈছে এই ঘৰৰ মালিক ।
অসমৰ প্ৰতিগৰাকী মহিলাৰ জীৱন সুখকৰ হোৱাটো আমি বিচাৰো বুলি প্ৰধানমন্ত্ৰীয়ে কয় । মেলেং মেটেলি পথাৰৰ পৰাই প্ৰধানমন্ত্ৰীয়ে কেন্দ্ৰীয় আৰু ৰাজ্য চৰকাৰৰ ১৭ হাজাৰ ৫০০ কোটি টকাৰ বহু কেইটা প্ৰকল্পৰ শুভ উদ্বোধন আৰু আধাৰশিলা স্থাপন কৰাৰ লগতে অসমবাসীক সম্বোধন কৰে ।
লগতে পঢ়ক : মূৰত মুগাৰ পাগুৰি, গাত পৰম্পৰাগত আহোম সাজেৰে লাচিতৰ বিশাল প্ৰতিমূৰ্তি উন্মোচন প্ৰধানমন্ত্ৰীৰ
