তেজপুৰ: সমাগত পোহৰৰ উৎসৱ দীপাৱলী । দীপাৱলীলৈ মাজত মাথো এটা দিন । চৌদিশে এতিয়া আৰম্ভ হৈছে ফটকা, আতচবাজী আৰু ৰং-বিৰঙৰ পোহৰৰ মেলা । এই দীপাৱলীত ফটকা, আতচবাজীৰ নামত ধোঁৱাত উৰি যাব কোটি কোটি টকা আৰু শব্দৰ প্ৰদূষণৰ লগতে বিনষ্ট হ'ব বায়ু । জীৱকুলৰ মাজত হাঁহাকাৰ পৰিৱেশে বিৰাজ কৰিব ৷ অথচ এই সকলোবোৰ জানিও যেন একো কৰিব নোৱাৰি । তাৰ মাজতে সমাজৰ আৰু প্ৰকৃতিৰ হিতৰ বাবে যেন চিন্তা কৰিছে কিছুসংখ্যক লোকে ।
বিশ্বনাথ জিলাৰ গহপুৰ মহকুমাৰ এখন গাঁও । এই গাঁওখন হৈছে গহপুৰৰ দক্ষিণ অঞ্চলৰ কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ সমীপৰ গোপাল জাৰণি গাঁও । তেওঁলোকৰ ব্যক্তিত্ব আৰু চিন্তাধাৰা দেখিলে আপুনি আচৰিত হৈ পৰিব । এই গাওঁখনৰ ৰাইজে দীপাৱলীত বিগত কেইবাটাও বছৰ ধৰি ফটকা, আতচবাজী ফুটুৱাৰ পৰা বিৰত থাকি ব্যতিক্ৰমী পদক্ষেপ দাঙি ধৰিছে ।
উল্লেখ্য যে, ৰাষ্ট্ৰীয় উদ্যানৰ সমীপৰ এই গাঁওখনৰ ৰাইজে দীপাৱলীত ফটকা ফুটালে ইয়াৰ শব্দৰ সম্পূৰ্ণ সুযোগ লৈ চোৰাং চিকাৰীয়ে ৰাষ্ট্ৰীয় উদ্যানখনত জীৱ-জন্তু বিশেষকৈ গঁড় চিকাৰ কৰাৰ সুযোগ গ্ৰহণ কৰে । আতচবাজীৰ শব্দৰ মাজতে গুলীয়াই গঁড় নিধন কৰাৰ পূৰ্ণ সম্ভাৱনা থাকে । সেই হেতুকে গোপালজাৰণিৰ ৰাইজে অগ্নিক সাক্ষী কৰি ফটকা নুফুটুৱাৰ বাবে প্ৰতিজ্ঞাবদ্ধ হৈছে ।
কাজিৰঙা ইক' ডেভলেপমেণ্ট ছ'চাইটিৰ সভাপতি গোপালজাৰণি গাঁৱৰ বাসিন্দা তথা পেছাত এগৰাকী পশু বিভাগৰ কৰ্মচাৰী বাসুদেৱ কুটুমে ই টিভি ভাৰতৰ লগত টেলিফোন বার্তালাপত কয়, "বিগত ২০১৭ চনৰ পৰা গাঁওখনৰ ৰাইজে কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ সুবিধাৰ্থে দীপাৱলীত কোনো ধৰণৰ ফটকা, আতচবাজী ব্যৱহাৰৰ পৰা বিৰত আছে । দুখনকৈ গাঁও মিলি এই প্ৰচেষ্টা হাতত লৈছে । মুঠ ১০০০ জনসংখ্যাৰ বসতি গাঁওখন ১৫ নং ৰাষ্ট্ৰীয় ঘাইপথৰ পৰা প্ৰায় চাৰি কিলোমিটাৰ দূৰত্বত অৱস্থিত আৰু কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা মাত্ৰ ৫ কিলোমিটাৰ দূৰত ।"
তেওঁ লগতে কয় যে এই ফটকা, আতচবাজীৰ সময়ত পূৰ্বতে চোৰাং চিকাৰীয়ে বন্যপ্ৰাণী নিধন কৰাৰ বিশেষকৈ গঁড় হত্যাৰ সুযোগ গ্ৰহণ কৰে । এই কাৰণতে স্থানীয় ৰাইজে ফটকা,আতচবাজী বন্ধ কৰি বন বিভাগক দায়িত্ব পালন কৰাৰ বাবে সহায় কৰে । ফটকা,আতচবাজী ব্যৱহাৰৰ ফলত বায়ুৰ প্ৰদূষণ অতি বেছি হয়, যি বন্যপ্ৰাণী আৰু মানুহৰ স্বাস্থ্যৰ বাবে অতি বিপদজনক । গাঁওবাসীয়ে কেৱল ফটকা, আতচবাজী ব্যৱহাৰৰ বন্ধ কৰাই নহয় স্থানীয় কোনো দোকানত এই সামগ্ৰী বিক্ৰী কৰাতো বাধা দি আহিছে । গাঁৱৰ ৰাইজে একমাত্ৰ পোহৰেৰে চাকি জ্বলাই আৰু বিভিন্ন ধৰণৰ লাইট ব্যৱহাৰ কৰি উদযাপন কৰি আহিছে দীপাৱলী ।
