জোনাই, ৪ মে’ : দেশে স্বাধীনতা পোৱাৰ প্ৰায় ৭৬ বছৰৰ পাচতো এখন দলঙৰ অভাৱত হাহাকাৰ কৰিছিল জোনাইৰ সীমান্তৱৰ্তী অঞ্চলৰ কেবাখনো গাৱঁৰ ৰাইজে ৷ দলংখনৰ অভাৱত জোনাইৰ সীমান্তৱৰ্তী কেমি-ঐৰামঘাট অঞ্চলৰ ছাত্ৰ-ছাত্ৰী, ৰোগীৰ লগতে সাধাৰণ ৰাইজে বিশেষকৈ বাৰিষাৰ সময়ত যাতায়তৰ ক্ষেত্ৰত ভুগি আহিছে যমৰ যাতনা ৷
কেমি নদীৰ ওপৰত এখন দলং নিৰ্মাণৰ দাবী কৰি বছৰ বছৰ ধৰি অঞ্চলতোৰ ৰাইজে বিভিন্ন মহলক বহু আবেদন-নিবেদন কৰি অহাৰ পিচতো কোনো গুৰুত্ব দিয়া নাছিল চৰকাৰ কিম্বা জনপ্ৰতিনিধিয়ে ৷ কিন্তু অৱশেষত জোনাইৰ বিধায়ক ভূৱন পেগুৱে ৰাইজৰ এই দাবীৰ প্ৰতি সঁহাৰি জনাই কেমি নদীৰ ওপৰত এখন লোহাৰ দলঙৰ নিৰ্মাণ কাৰ্য আৰম্ভ কৰে ৷
স্বাধীনতাৰ প্ৰায় ৭৬ বছৰৰ পাচত চৰকাৰীভাৱে এখন দলং লাভ কৰাত বিধায়ক ভূৱন পেগু আৰু সাংসদ প্ৰদান বৰুৱাক ধন্যবাদ জ্ঞাপন কৰে অঞ্চলটোৰ ৰাইজে ৷ দুয়োগৰাকীৰ প্ৰচেষ্টাত পলমকৈ হ'লেও চিলে বা কেমি নদীৰ ওপৰত এখন লোহাৰ দলঙৰ নিৰ্মাণ কাৰ্য আৰম্ভ হোৱাত উৎফুল্লিত হোৱা দেখা গৈছে সীমান্তৱৰ্তী কেমিবাসী ৰাইজক ৷
উল্লেখ্য যে বাৰিষাই হওক, খৰালিয়ে হওক, একাঠু পানী গচকি কেমি নদী পাৰ হৈ নিতৌ যাতায়াত অব্যাহত ৰাখিছিল কেমি, ঐৰামঘাট, জামপানী আদিৰ ছাত্ৰ-ছাত্ৰীৰ লগতে গাঁওবাসী ৰাইজে ৷ এনে সময়তে বৃহত্তৰ অঞ্চলটোৰ ৰাইজৰ দুখ-দুৰ্দশাৰ প্ৰতি গুৰুত্ব প্ৰদান কৰি বিকল্প হিচাপে এখন লোহাৰ দলঙৰ নিৰ্মাণ কাৰ্য আৰম্ভ কৰাত ধন্যবাদ জ্ঞাপন কৰে অঞ্চলটোৰ ৰাইজে ৷ লগতে বাৰিষাৰ পূৰ্বে দলংখনৰ নিৰ্মাণৰ কাম সম্পূৰ্ণ কৰিবলৈ আহ্বান জনায় স্থানীয় ৰাইজে ।
লগতে পঢ়ক : দিখৌ-ব্ৰক্ষ্মপুত্ৰ-দৰিকাৰ সংগমস্থলীত এজাক দুৰ্ভগীয়া শিক্ষাৰ্থী - Demand To Construct A Bridge
