মৰিগাঁও, 30 এপ্ৰিল : মৰিগাঁৱত সংঘটিত হৈছে এক শোকাৱহ পথ দুৰ্ঘটনা ৷ মৃত্যু ঘটিছে এজন শ্ৰমিকৰ ৷ জোখতকৈ অধিক মাত্ৰাত ইটা কঢ়িয়াই অনা এখন বাহন দুৰ্ঘটনাত পতিত হয় ৷ অধিক ইটা কঢ়িয়াই অনাৰ বাবে চালকে বাহনখন নিয়ন্ত্ৰণ কৰিব নোৱাৰি প্ৰথমাৱস্থাত তিনিজন লোকক আহত কৰে ৷
স্থানীয় ৰাইজৰ তৎপৰতাত আহত দুজন লোকক ইটাৰ মাজৰ পৰা টানি উলিয়াবলৈ সক্ষম হয় যদিও এজন লোক বেয়াকৈ গাড়ীৰ তলত সোমাই পৰে ৷ তেওঁক বচাবলৈ চালকে জেচিবিখন লৈ আনে যদিও ইটাভাটাৰ মেনেজাৰে জেচিবিখন ঘূৰাই লৈ গুচি যায় ৷ উদ্ধাৰ কৰা আন দুয়োজন লোকক চিকিৎসালয়লৈ পঠিওৱা হয় ৷
স্থানীয় ৰাইজৰ ভাষ্য অনুসৰি কেৱল মেনেজাৰৰ বাবেই গাড়ীখনৰ তলত পৰি যোৱা মানুহজনৰ মৃত্যু ঘটে ৷ জেচিবিখন আনি গাড়ীখন উঠাব পৰা হ’লেই মানুহজন বাচি গ’লহেতেন বুলি মন্তব্য কৰে তেওঁলোকে ৷ ঘটনাৰ পিচত সমগ্ৰ অঞ্চলটোতে শোকৰ ছাঁ পৰিছে । আনহাতে চিকিৎসালয়ত ভৰ্তি হৈ থকা দুজনৰ মাজত এজনৰ অৱস্থা কিছু সংকটজনক বুলি জানিব পৰা গৈছে ৷ বাহনখনত অভাৰলোড কৰি ইটা অনাৰ বাবেই বাহনখন দুৰ্ঘটনাত পতিত হয় ।
মৰিগাঁও জিলাত ক্ৰমাৎ কাঠফুলাৰ দৰে গঢ় লৈ উঠিছে অবৈধ ইটাভাটা । যাৰ বাবে সঘনে সংঘটিত হৈ আহিছে এনে দুৰ্ঘটনা । মঙলবাৰে মৰিগাঁও মিকিৰভেটা গাঁৱত সোণাই নৈ পাৰত থকা এটা ইটাভাটাৰ মেনেজাৰৰ মইমতালিৰ বাবে মৃত্যুক সাৱটি ল’লে এইজন শ্ৰমিকে । ৰাইজৰ অভিযোগ অনুসৰি টাটা DI বাহনত 1000 ইটাৰ ঠাইত 1500 ইটা কঢ়িয়াই আনিছিল বাহনখনে । বাহনখনত আছিল চাৰিজন লোক ।
ভাটাৰ পৰা ইটা কঢ়িয়াই কিছু দূৰ যোৱাৰ পাচতে নিয়ন্ত্ৰণ হেৰুৱাই পথৰ ওপৰতে বাগৰি পৰে বাহনখন । ফলত ইজাজুল হক নামৰ লোকজন সোমাই পৰে গাড়ীৰ তলত । ঘটনাস্থলীত স্থানীয় লোক উপস্থিত হৈ যদিও ইতিমধ্যে মৃত্যু হয় ইজাজুলৰ ।
লগতে পঢ়ক : কাকপথাৰত ভয়ানক পথ দুৰ্ঘটনা: থিতাতে নিহত দুই - Road Accident In Kakopathar
