নলবাৰী, ১২ অক্টোবৰ : অন্ত পৰিল দেৱী দুৰ্গাৰ আৰাধনাৰ অন্যতম উৎসৱ দুৰ্গোৎসৱৰ । বিধি মতে শুকুৰবাৰে মহা অষ্টমী আৰু মহা নৱমী তিথি একেলগে পৰাত শনিবাৰে হৈছে দশমী । আনহাতে, মহা নৱমীৰ সন্ধ্যা উখল-মাখল পৰিৱেশ বিৰাজ কৰে ৰাজ্যৰ পূজা মণ্ডপসমূহত । পাৰ ভঙা উছাহেৰে ভক্তপ্ৰাণ ৰাইজে ভিৰ কৰে পূজা মণ্ডপসমূহত ।
নলবাৰীতো একেই পৰিৱেশ বিৰাজ কৰা দেখা যায় । জিলাখনৰ বিভিন্ন পূজা মণ্ডপৰ লগতে নলবাৰীৰ ফৰেষ্ট অফিচ পথস্থিত ১৮ সংখ্যক বাৰোৱাৰী শ্ৰীশ্ৰী দুৰ্গা পূজাত নৱমীৰ দিনা ভক্তৰ লানি নিছিগা সোঁত বয় । নৱমীৰ সন্ধিয়া আৰতীৰ পিচতেই নলবাৰীৰ এই আটকধুনীয়া পূজাস্থলীলৈ হাজাৰ হাজাৰ ভক্তৰ সোঁত বয় । নিজৰ মনোবাঞ্ছা লৈ দুৰ্গতিনাশিনী দেৱী দুৰ্গাৰ আশিস লয় ভক্তপ্ৰাণ ৰাইজে ।
উল্লেখ্য যে নলবাৰীৰ প্লাষ্টিকমুক্ত এইখন বাৰোৱাৰী শ্ৰীশ্ৰী দুৰ্গা পূজাত এইবাৰ বাঁহ আৰু মৰাপাটেৰে পূজা মণ্ডপৰ মূল তোৰণ সজোৱা হৈছিল । আহিন মাহৰ শাৰদী সুবাসসনা কঁহুৱা, বাঁহ আৰু মৰাপাটেৰে সজাইছিল মণ্ডপৰ তোৰণ । কোনো প্লাষ্টিকজাতীয় সামগ্ৰী ব্যৱহাৰ নকৰাকৈ পূজা মণ্ডপত সকলো দিশতে স্বাস্থ্যৰ প্ৰতি সচেতনাৰে সজাইছে মণ্ডপ । যাৰ বাবে নলবাৰী চহৰৰ উপৰি জিলাখনৰ ভিন্ন প্ৰান্তৰ পৰা অহা ভক্তসকলে এই পূজাখনৰ প্ৰতি আকৰ্ষিত হয় ।
কোনোৱে যদি বাঁহৰ চুঙাৰ সন্মুখত চেলফি উঠিছে, আন কোনোবাই আকৌ মূল তোৰণৰ সন্মুখত । মুঠৰ ওপৰত আটকধুনীয়া এই পূজা মণ্ডপে সকলোৰে দৃষ্টি আকৰ্ষিত কৰিছে । উল্লেখ্য যে এইখন পূজাত বিৰাজ কৰে সম্পূৰ্ণ আধ্যাত্মিকতা আৰু মণ্ডপৰ ভিতৰভাগ মহিলাৰ দ্বাৰা পৰিচালিত হয় । লগতে চৰকাৰী সকলো নীতি-নিৰ্দেশনা মানি সকলো দিশতে ভক্তৰ কোনো অসুবিধা নোহোৱাকৈ বাহিৰভাগ পুৰুষসকলে পৰিচালনা কৰে ।
আনহাতে, এইবাৰ এইখন দুৰ্গা পূজাই ভক্তপ্ৰাণ ৰাইজৰ আহ্বানত দশমীৰ দিনা নিদিয়ে প্ৰতিমা বিসৰ্জন । দশমীৰ দিনা কেৱল আধ্যাত্মিকতাৰ সম্পূৰ্ণ ৰীতি-নীতিৰে ঘট আৰু যিজোপা কলগছক দেৱী প্ৰতিষ্ঠা কৰিছিল সেইজোপা কলগছক বিদায় দিব বুলি আয়োজক সমিতিয়ে জানিবলৈ দিয়ে । আয়োজক সমিতিয়ে জনোৱা মতে, ভক্তপ্ৰাণ ৰাইজে দশমীত প্ৰতিমা বিসৰ্জন নিদিবলৈ আহ্বান জনোৱাৰ বাবে অহা ১৩ অক্টোবৰ, দেওবাৰেহে অশ্ৰুসিক্ত নয়নেৰে বিদায় দিব দেৱী মাৰ প্ৰতিমাক ।
